Shillong, June 16: Ka Political Affairs Committee (PAC) jong ka Shillong City National Peoples’ Party (NPP) kala pynpaw ia ka jingsngewkhia kaba halor kane ka jingiapyibor ha pdeng ka sorkar bad ka seng KSU halor ka jingshna ia ka lynti rel ha Byrnihat.
Ka PAC jong ka seng NPP kaba la ia kynduh hapoh ka jingpyniaid jong u Bah W. Kharmujai, President, Shillong City jong ka seng National Peoples’ Party, ha kaba la ia don lang u Bah T. Pohthmi, General Secretary, u Bah Manroi Kharpuri Chief Organiser bad u bah Erwin K. Syiem Sutnga, Advocate.
Na ka liang jong ka PAC jong ka NPP kala shim ia kaei kaba la mih ha ki lad pathai khubor bad ka sorkar Congress hapoh ka jylla Meghalaya kan tohkit halor ka jingkynnoh bad ka seng KSU ka don ka jingiadei bad ka seng lehnoh HNLC kumba la kam da ka seng HNLC.
Ha ka juh ka por ka PAC jong ka NPP, ka la ong ba kan long kaei kaei kaba bha na ka bynta ka jingtip u ba bun ba lang ba dei ban phah tohkit halor ka jingkam jong ka seng HNLC ba u Myntri rangbah ka jylla u Dr Mukul Sangma u pan jingkyrshan na katei ka seng kaikhlaw na ka bynta ka MLA Election ka ban long ha u snem 2018. Ki paidbah jong ka jylla Meghalaya ki don ia ka hok ban tip ia kane ka jingkam jong ka HNLC ym lah ban shu klet noh kumto.
Kan long kaei kaei kaba bha ban tohkit halor ka jingkynnoh ia ka KSU bad ka seng HNLC ba ki don ka jingiadei bad ha ka juh ka por ki pulit jong ka jylla Meghalaya ki hap ban shim khai ia ka jingkam jong ka seng HNLC bad ban leh ia kaba don kam ban iashai ong u Bah Thrangki Pohthmi, General Secretary,Shillong City NPP.
