Shillong, Jylliew 17: U myntri rangbah ka jylla u Dr Mukul Sangma, u la ong ba kan long kaba bakla lada ka Khasi Hills Autonomous District Council, kim ai No Objection Certificate na ka bynta ban shna ia ki surok kiba hap hapoh jong ka East Khasi Hills, u la ong ba kum ki nongmihkhmat paidbah kila dep ban shim ia ka jingsmai ba kin trei khlem tieng ne riej ban pyndep ia ka kam kum ki nongmih khmat.
Haba phai sha u Uranium u myntri rangbah u la kren shai ba, ban tih Uranium ka dei ka kam jong ka sorkar pdeng, lada ka don ka jingtih ka sorkar kan shim shuwa ia ka jingsngew jong u paidbah ba bun balang ban ioh ia ka jingiamynjurlang, bad lada ruh ka dei ban long na ka bynta ka jingmyntoi jong ka jylla.
Halor kane ka phang u myntri rangbah u la ong peit iakaei kaba long ha shuwa jong u snem 2010 bad ha dien jong u snem 2010, ym dei ban shu don than ia ka mynsiem pyrkhat da kumne da kumtai, dei ban peit ia ka jingbha jong u ba bun balang, kibriew ki don kam ia ki kam pynroi ymdei ban long ki dieng pynkiang, u la ong ka don shibun ka jingbym ia biang ha ki kam pynroi peit kajingsah dien jong ka East Garo Hills, South Garo Hills, West Khasi Hills, South West Khasi Hills.
Halor ka jingong jong ka ministry Road transport bad highway ba kala ong ia ka sorkar jylla ba ka dei ban pynioh ia ka NOC hapoh shibnai lem kumta kin wengnoh ia ki skhim shna surok kaba la kot sha ka T.4000 klur ha kane ka jylla, u myntri rangbah u la ong ba halor kane u la bthah ia u Chief Secretary ban khot ia ka jingialang.
U myntri rangbah u la batai bniah ha kaba ia dei bad ki surok kiba yn sa pyntrei ha kane ka jylla Meghalaya kaba dei na ka skhim ba kyrpang jong ka sorkar pdeng ia kaba la tip kum ka Special Assistance Rural Development Programme (SARDP) ia kane la leh da ka sorkar UPA bad u da pynpaw ia ka jingsngewnguh ia ka president jong ka AICC ka Sonia Gandhi kaba la shim khia ia kane ka kam kum juh ruh ia u Vice President jong ka party u Rahul Gandhi.
Na ka liang jong u myntri rangbah u la ong bay m dei ban shu ia buh than ia ki jingmut jingpyrkhat kiba bakla to peit ruh ia ka jingdon kam jong ki paidbah ha kaba ia dei bad ki surok ka long kaba don kam ia ki surok ha kane ka jylla Meghalaya, u la ong ba baroh ki surok ha ka jylla ki dei ban iakynduh ia ki national Highway bad baroh ki surok ki dei ban ia kynduh ia ki District headquarter, u la kdew ba ki suro kiba don kam ban shan ban sul ka leit ka wan ka long na Baghmara sha Ranikor, na Ranikor sha Nongstoin lyngba ka Phalangdiloin, Na Nongstoin sha Kyrshai lyngba ka Rambrai, na Nongstoin sha Shallang bad mih sha Boko, na Umsning sha Jagiroad bad kumta ter ter.U la ong ba na Balat sha Shella, na Shillong sha Shella na Shillong sha Dawki kynthup lang ia ka jingkieng Dawki.
Haba ia dei bad ki surok kiba hap hapoh jong ka Garo Hills, u myntri rangbah u la bthah ia ka Garo Hills Autonomous District Council ba kan ai noh ia ka NOC na ka bynta ban pyntrei noh ia ki surok, u la ba ka surok kaba eh tam ban shna mynta kan long na Chokpot sha Wiliamnagar kaba hap ban iaid lyngba jong ki lum Durama.
