Shillong, Iaiong 10: Ban iarap ia ki paidbah kiba la duh ia ka kamai kajih jong ki, khamtam kito kiba buh ia ki dukan barit baria bad kum juh kito kiba bylla kiba khlem da register bad kino kino ki bor jong ka sorkar, ka sorkar kala pynbna ban iarap T.700/- tyngka lyngba ka Chief Minister’s Relief Against Wage Loss scheme.
U Sumbut myntri rangbah ka jylla u bah Prestone Tynsong u la iathuh ba haduh mynta ki aplikoshon kiba la ioh pdiang da ka sorkar kila poi sha ka 98,000 tylli bad ki dang don kaba ki Block Development officer ki dang hap ban pynpoi bad u la ong ba baroh ki lah ban poi haduh 1,10,000 tylli ki aplikoshon.
La iathuh ba ia kine baroh ki hap ban pynrung ha ka data ban peit bniah ba ioh ki don ba rung kyrteng ar sien, u symbut myntri rangbah u la ong ba leh se ha kane ka taiew ban wan la lah ban pynbeit ia ki kyrteng jong ki nongioh ia kane ka jingmyntoi.
Haba la kylli hato ka sorkar kan leh kumno na ka bynta kito kiba khlem don ia ka Bank akkount, ne ia ka EPIC, halor kane ka jingkylli u symbut myntri rangbah ka jylla u la ong ba kane ka dei ka jingsneng ia kito kiba khlem don ia ka Bank Akkount lane ia ka EPIC. Ki bym don EPIC dei tang kiba dang khynnah.
