Shillong, Nailar 18: Ka Meghalaya State Food Commission kala ong ba la pynlong ain ia ka National Food Security Act, 2013 ban pynbiang ia ki marbam bad ki jingbam tei met kiba shngain da kaba pyntikna ia ka jingioh pura ia ki marbam kiba bha ha ka dor kaba bit.
Hapoh kane ka Act, 75% and 50% jong ki nongshong shnong ha nongkyndong bad sor ki shah kdup hapoh ka Targeted Public Distribution System (TPDS) ha ka jingioh kaba 5 kilo shi khlieh briew shibnai. Kiba duk, ki longing Antyodaya Anna Yojana (AAY) ki ioh 35 kilo shi iing shi bnai.
Lah ban ioh ia ki marbam hapoh ka TPDS ha ka dor subsidy, kata T.3/2/1 shi kilo ia u khaw/ata/kew na ka bynta 3 snem namar ki dor ki long katkum ka Minimum Support Price (MSP)
La pynkupbor ia ki kynthei hapoh kane ka Act namar la ai kyrteng ia ki card rashon ha ka kynthei kaba heh duh jong ka iing kaba la palat 18 snem karta.
Ki longkmie ba armet, ki longkmie ba dang aibuin bad ki khynnah kiba hapoh 6 bnai haduh 14 snem ki don hok ban ioh ia ki jingbam tei met kumba la buh kyndon hapoh ka skim bad program jingshakri jong ka Integrated Child Development Services (ICDS) bad ka Mid-Day Meal (MDM). Ia ki khynnah ki bym biang ki jingbam tei met kiba haduh 6 snem karta, la pynbiang kham bun ia ki jingbam tei met.
Hapoh kane ka ain ka long kaba donkam ban pynpaw ia ki kaiphod kiba iadei bad ka PDS, ka jingkhein jingdiah bad ka jingthung ia ki Vigilance Committee ban pyntikna ia ka jingtreikam kaba shai bad kaba biang jingkhein.
Ki jaka ba lah ban phah ia ki jingujor bad ban pynbeit ia ki jingeh ha ka Jylla bad ha ki Distrik. La thung ia ki Deputy Commissioner kum ki District Grievance Redressal Officer (DGRO). Ha ki khep bad ki paidbah kim ioh ia ki marbam lane ki jingbam kumba ki dei ban ioh, ki la ban phah jingujor sha ki DGRO.
La thung ia ka Meghalaya State Food Commission ban bishar bad peit bniah ia ka jingpynteikam ia ka Act bad ka don ka bor ban dain kuna haba don ka jingpynkhein ia ki kyndon jong ka Act. Ki apil pyrshah ia hokum jong ki DGRO kan shong ha ka rai jong ka State Food Commission.
Ki nongshong shnong ki lah ban phone sha ka Meghalaya State Food Commission na ka bynta ki jingtip kiba bniah ha u Telephone No.2505517 lane phone sha ka Call Centre jong ka Food Civil Supplies & Consumer Affairs Department ha u No.1967 khlem donkam siewdor.
