Shillong, Jylliew 15: Mynta ka jan miet ki briew kiba ym lah ban tip katba ki paidbah ki dang ia bun kam ban leit phai sha la ki jong ki iing ki sem ha basa tympew ki briew kiba ym lah ban tip kila kawang da u petrol bomb ia kawei ka dukan die rong ia kaba la tip kum ka G M Hardware kaba don ha katei ka jaka.
Katkum ki lad khubor kiba la lah ban ioh la ong ba ha kane ka jingshah kawang petrol bomb kam shym don kano kano ka jingjia kaba sngewsih ha kaba ki briew kiba don ha kane ka dukan ha kane ka por kila lait na ka jingmynsaw na ka liang jong ki pulit ruh kila leit bran bran sha katei ka jaka ban tem ioh ka mih kano kano ka jingjia.
Kane ka dukan die rong kaba la shah kawang petrol bomb ka dei ka dukan die rong ia kaba la ai kyrteng G M Hardware, na ki bilor kiba la ioh ban lum da ki pulit la ong ba ki riew sniew kila thep ia ka petrol ha ki bilor beer. U trai jong kane ka dukan la tip kyrteng kum u Maseh Chachan.
Ha kawei pat ka jingjia ka ophis jong u Range Forest Officer, Mairang jong ka tnad khlaw kaba don ha Mairang West Khasi Hills District kala shah kawang petrol bomb ha kaba ka jingkhang heh jong kane ka ophis kala julor bad ki pyrda kila ieng.
