Jowai, Nohprah 10: U Deputy Commissioner jong ka West Jaiñtia hills District haka jingkren jong kum u kongsan ha ka jingplie ia ka Ïew ki Nongrep ne ka farmers’ market haka H.K. Singh School, Jowai ula ong ba kawei na ka jingeh jong ki nongrep ka dei ka ïew ban die ïa ki marrep jong ki.
Wat ki marep kiba la rep khlem dawai ne sboh dawai ruh; kim pat ïoh satia ka ïew kaba biang ba kin lah ban die ïa ki marrep jong ki ha ka dor kaba biang. Namar kata naka liang jong ka sorkar kan khmih ban pynjem ïa kane ka jingeh kaba ki nongrep ki ïakynduh.
Ha ka jingïalang kaba la long ha H.K. Singh School, Jowai, u D.C. ka West Jaiñtia hills ula ïaroh ïa ka Society for Urban and Rural Empowerment (SURE) kaba la ïarap bad kyrshan ïa ki kynhun ïarap dalade ïalade (SHGs) kiba la wan rah ïa ki mar kiba pynmih hi dalade.
Haba kren kum u shongknor jong ka jingïalang u H.H.Mohrmen uba long u Secretary jong kane ka Seng ula ong ba ïa kane ka ïew la pynlong daka jingïatreilang bad ka North East slow Food and Agro-biodiversity Society (NESFAS).
Ha kane ka sngi ki nongrep kiba mihkhmat ïa ki SHG jong ki; kila wan na ki shnong bapher bapher bad ki marrep kiba la wan rah ha kane ka sngi ki dei kiba la rep da ka rukom rep tynrai khlem da pyndonkam da ki sboh dawai ne dawai umphniang kiba lah ban ktah ïa ka jingkoit jingkhiah jong ki paidbah. Nalor kata la wan rah ruh ïa ki jingbam tynrai, ki jhur khlaw bad ki mar kiba la pynmih da ki nongrep.
Ha kane ka jingïalang la ïoh ruh ïa ka jingkren na u ma Kobarness Tlang uba long u President jong ka kynhun ki nongrep (Farmers Producer Organisation) jong ka Thadlaskein Block.
