Jowai, jylliew 07: Ka All Jaintia Youth Welfare Organisastion-East Jaintia Zone (AJYWO-EJZ) lyngba u President jong ka u Bah Wanshwa S. Suting ka dawa na u Deputy Commissioner bad na u District Transport Officer jong ka East Jaintia Hills District ban kem noh naphang ia ki kali private ki ba kamai ha East Jaintia Hills District.
Ka Seng ha ka kyrwoh ka la ong, `Ka long kaba lyngngoh ban iohi ba wat haduh mynta ba la pyntrei kam ia ki Local Taxi Khliehriat Region ha East Jaintia Hills District, dang don shibun bah, ki kali private ki ia kamai lang bad ki local taxi ha East Jaintia Hills District kata khamtam eh ha kaNational Highway 44 kaba la pynlyngngoh ia ka seng AJYWO-East Jaintia Zone haduh katta katta.`
La kynthoh ruh ba ka jingiohlad jong kitei ki kali shimet ban kamai ha ka district, ym tang ba ka long kaba beain hynrei ka ktah ruh ia ka ja kpoh jong kito ki bapli ki kali local taxi, kiba la dep iaid ia lade kat kum ki kyndon jong ka Motor Vehicle Act 1988 na ka bynta ban ioh long kum ki kali kamai paidbah.
Ka Seng namar kata, ka dawa jur na u Deputy Commissioner bad u DTO jong ka EJHD ban pyntrei kam ia ka ain kaba la don lypa da kaba peit ngor ba ki kali shimet kiba ia knieh ja kpoh bad ki kali kamai local taxi bad ruh ban kem ia ki mardor man la ka sngi bad ruh ban pynshitom ia ki da kaba tyngeh kat kum ki kyndon jong ka ain khnang ba kin kyndit bynriew bad sangeh noh ia lade na kaba ia knieh ia ka kamai kajih jongki kali local taxi.(SP News)
