Shillong, Naitung 15: Ki bor ba dei peit iaka District administration mynta ka sngi ki la phah iaki magistrate sha Mawsynram ban peit ba kan nym mih kano kano ka huri hura na ka jingleit jong ka seng khasi hima Mawsynram (SKHM) sha ka kren Mawjymbuin ban pynlong ia ka knia ka khriam ha katei ka jaka.
Ha kane ka sngi na ka liang jong ka kong Aiti Mawlong Magistrate ba don ha kane ka jaka la long ba na lat Mawjymbuin la pynsangeh ia kane ka kynhun jong ka SKHM kaba la ialam da u Bah Tyllilang Myrthong president, iaki la ialam sha Mawsynram police station ha kaba la pynlong ia ka jingialang ban ia kren ia kane ka kam.
Ha dien ka jingialang, la shim ia ka rai ba lada don kam ban leit sha katei ka krem mawjymbuin ban pynlong ia kano kano ka jinglehniam hap ban shim ia ka jingbit na ka dor bar shnong Mawsynram, ha kane ka sngi la shim ia ka rai ruh ba yn sa khot biang ia kane ka jingialang ha pdeng ka SKHM, ka dorbar shnong bad u Syiem jong ka hima.
Ha kane ka sngi ki paidbah nong shong shnong jong ka shnong Mawsynram ki la ia mihp aidbah ban ia leit sha katei ka krem Mawjymbuin ban ia ap bah khang la da don kano kano ka kynhun kaba kwah ban leh ia kano kano ka jingknia da ka jingthmu ban shimti ia kane ka krem Mawjymbuin, kumba la thmu da ka Seng Khasi Hima Mawsynram.
Dang ha kine ki sngi ha ba kren ha ki lad pathai khubor ha Shillong Press club, ka dorbar shnong Mawsynram kala kren shai kdar ba kane ka krem Mawjymbuin ka dei ka jong u paidbah, hynrei ka hap hapoh ka jingpeit jong ka shnong Mawsynram, ia ki briew ki ba kwah ban leit sha ka tei ka jaka ym don jingkhang ba kin leitkai ne kin pynlong ia kano kano ka jinglehniam jong ki no kino ki kynhun hynrei kim lah ban kam trai.
