Jowai, Jymmang 12: Ka AJYWO Central Body ka pynpaw ia ka jingpyrshah ka ba jur halor ki jingpyrshang jong ka sorkar banpyntrei kam jubor ia ka National Poulation Register (NPR) lane kata ka Aadhaar Number khlem da iaid kat kum ba la rai ha ka jingialang jong ngi ki sengbhalang bad ka sorkar jylla hapoh ka jingialam jong u Dr Mukul Sangma, kum u Chief Minister ka Jylla kaba la long ha ka 24.11.2015 ha Main Secretariat Building Shillong.
“Ka rai ka ba la shim ha ka jingialang kaba 24.11.2015 hadpdeng jong ki sengbhalang jong ka jylla bad ka sorkar jylla ha ka jingiadei bad ka NPR ka long ba ka sorkar ka dei ban da ai shwa ia ki jingpynshai paidbah kiba shai bha da kaba iaid na ka wei ka Shnong sha ka wei pat, da kaba shna ia ki calendar kiba thikna na ka bynta ban pynlong ia katei ka prokram ingpynshai paidbah ha ka jingiadei bad ka NPR (Aadhaar No) bad hadien kata, ka mon kan dei ka jong u paidbah, la un pdiang ne un kyntaid i aka NPR hynrei kaba sngewsih pat de ka long ba ka sorkar kam shym la iaid kat kum katei ka rai” ong u Bah M H Dkhar President jong ka AJYWO Central Body.
“Ha shwa ba ka sorkar kan sdang pyntrei kano kano kano ka kam kaba u paidbah u dawa jingshai paidbah shwa, ka sorkar ka dei ban iaid shwa kat kum ka mon jong u paidbah hynrei kam dei pat ban leh da ka bor pyrshah ia ka mon jong u paidbah. Ka jingdawa ban ioh jingpynshai ba thikna halor ka NPR da u paidbah na ka jingpyntrei kam ia ka NPR (Aadhaar No) ka dei ka hok jong u paidbah” La bynrap shuh shuh u Bah Dkhar.
“U Bah Dkhar u la ong ruh ba wat na ka liang jong ngi kum ki sengbhalang ngi shait leit hi sha ki jingialang pynshai paidbah jong ka sorkar jylla ha halor ka NPR (Aadhaar No) bad ngi la pan ruh bun ki jingpynshai kiba iadei khamtam na ka bynta ka jinglongshngaiñ jong ka jaidbynriew rit paid trai ri trai muluk ha ka jylla na kaba pyntrei kam ia ka NPR hynrei ka sorkar kam shym la lah ban ai ia ka jingpynshai kaba pynhun ia ngi bad dei namar kata ka daw ba ngi dawa i aka jingpynshai paidbah na ka sorkar jylla halor katei ka phang”.
U bah M H Dkhar u la ong shuh shuh da ka ba pynkynmaw ba ha kawei jingialang kaba ka sorkar ka la pynlong State Central Library, Shillong ha ka 11.02.2015 ha ka jingiadei bad ka NPR, la batai da ki briew jong ka sorakr ha katei ka jingialang ba ka jingpynrung kyrteng ha ka NPR kan long ia baroh ar jaid ki briew ki ba don ha India- kata ia ki Nong India bad ruh wat ia ki bar ri ruh bad lada kane kan long kumne kan buh ia ki trai ri trai muluk rit paid jong ngi ha ka jingma kaba khraw nalor ba la hap ban pynrung ha NPR sa ia kiwei pat ki nongshongshnong jong ka ri India ki ba la shong la sah 6 bnai shaneng ha kino kino ka jaka (Shnong) ha Ri India.
U Bah Dkhar u la ong shuh shuh ba ka wat ka Supreme Court ba donburom jong ka Ri India ruh ka la rai lypa ba ym dei ban pynlong salonsar (Mandatory) ia ka jingpyntrei kane ka NPR. Ka monk a shong ha u paidbah la u mon pynrung kyrteng ia lade ne um mon ban pynrung ia lade ha ka NPR bad ba ka sorkar kam dei ban pynduh ia ki jingmyntoi ba u nongshongshnong jong ka ri India u dei hok ban ioh tang na ka daw ba um don kyrteng ia lade ha ka NPR lane don ia uta u Aadhar Number.
Ka AJYWO ka ong ba kim pat shai i aka NPR, ka dei ka ei? ka mut aiu bad kaei ka jingiohnong bad jingduhnong na ka ba pynrung lane khlem pynrung ia lade ha ka NPR (Aadhaar Number). Namar kata ka daw ka AJYWO ka dawa na ka sorkar jylla ban pynsangeh shuwa ia ka jingpyntrei kam ia ka NPR (Aadhar Number) bad ban ai shuwa i aka jingbatai kaba shai sha ki paidbah da kaba iaid lyngbah sha man la ki Shnong ha ka jylla bad hadien kata, ka shong ha ka mon jong u paidbah lada u kwah un mat pynrung ia lade bad lada um mon ruh ka shong ha u.
