Shillong, Naiwieng 24: U shnongknor jong ka kynhun Meghalaya Democratic Alliance (MDA) u Conrad K Sangma u ba dei ruh u myntri rangbah ka jylla u khlem buh kano kano ka mat ia kren ha ka jingialang kaba la khot ban long la shai ka sngi ia baroh kiba ia don lang ha ka kynhun.
Ki thymmei khubor ki iathuh ba kane ka jingbym buh ia kano kano ka mat ia kren ha ka jingialang jong ka MDA ka long ba ki party bad ki MLA shimet kiba ia don ha kane ka kynhun MDA ki lah ban wanrah ia kano kano ka phang kaba ki sngew ban ia kren khlem da don kano kano ka jingbuh kyndon.
Ki party kiba ia don ha kane ka kynhun MDA hapoh ka jingialang jong ka NPP, ki long ka UDP, PDF, BJP, HSPDP, NCP, KHNAM bad ki MLA shimet kum u bah Lambor Malngiang, ka jingkhot ia ka jingialang MDA ka long ba kin ia kren ia ki jingeh kaba ki iakynduh bad ha ka juh ka por kumno ban nang kham pynbha shuh shuh ia ka jingtrei kam jong ka sorkar MDA.
Ka jingle jong ki nongialam jong ka party BJP ha kine ki khyndait bnai ban kynthoh pyrshah ia ka sorkar khlem da rah ia ki jingeh hapoh ka kynhun MDA namar ba ki don lang ha ka sorkar kala wan rah ia ka jingiapher jingmut hapdeng ki nongialam jong ki party kiba ia don lang ha ka sorkar MDA kumba ka la paw ha ki Lat pathai khubor.
