Shillong, Nailur 07: Ka sorkar mynta ka don hapdeng ka jingeh kumno ban leh ia kito ki iing kiba la dep ban shna ki bym hap hapoh jong ka municipal area namar kala don ka hukum ba ia ki iing kiba la shna khlem da ioh jingbit na ka Meghalaya Urban development Authority (MUDA) ymd ei ban ai light lane ka um ba kin ring sha ki iing.
Katkum ki khubor kiba la ioh da u SP News Agency ki iathuh ba bun bah ki iing kiba la dep ban shna kiba don sha bar jong ka Shillong municipal Board (SMB) hynrei haduh mynta kim ioh ia ban ring light lane ban tan um sha ki iing ki sem na ka daw ba ha ka por ba ki shna kim pat don kam ban shim jingbit na ka MUDA.
Ki thymmei khubor ki iathuh ba na ka liang jong ka MeECL kam treh ban ai light sha ki iing kiba khlem ioh jingbit na ka MUDA bad kum juh na ka liang jong ka PHE kam treh ban ai jingbit ban ring um sha ki iing namar ba kim shym la ioh jingbit na ka MUDA. Kane kala buh jingeh ia ki to ki briew kiba la dep ban shna ia ki iing ki snem.
Ki thymmei khubor kiba ia jan bad ka tand Pynroi sor ki ong ba wat ka sorkar mynta ka don ha pdeng ka jingeh kaba khraw kumno ban leh ia kane ka kam, namar kine ki iing ki dei kiba la dep ban shna shuwa ba kan mih ka hukum ban shna iing ha kito ki jaka kiba lait na ka Municipal ruh ki hap ban da ioh ia ka jingbit.
Ki thymmei khubor ki iathuh ba ka sorkar mynta ka dang wat ia ki lad ki lynti kumno ban pynbeit ia kane ka jingeh namar katkum ka hukum ba la pynmih da ka tand pynroi jong ka sorkar ka long ba baroh ki iing kiba hap hapoh jong ka Greater Shillong lada dei ban shna ki hap ban ioh ia ka jingbit na ka MUDA lem kumta kin nym ioh light ne Um.
