Shillong, Iaiong 08: U Bah John F Kharshiing Co-Chairman jong ka Meghalaya State Planning Board ha ka sngi thohdieng u la khot ia ka jingiakynduh lang jong ki lai tylli ki Autonomous District Council bad ia ki khlieh nongsynshar ban ia kren halor ka rukom bat khyndew bat shyiap.
Ka jingkhot ia kane ka jingialang ka long ban ia kren halor ki skhim kiba bun kiba ka sorkar ka pyntrei mynta ha ki bynta bapher bapher jong ka jylla, ha kaba hap ban register ia kine ki jingtrei bad ki bor jong ka ain katkum ka Indian Registration Act 1908, ha kaba don kam ka jingia siew pisa na ka bynta kane.
Haba ia dei bad kane ka bynta, baroh la ia tip ba ha kane ka jylla Meghalaya ki don haduh khatsan jait ka rukom bat khyndew, kiba dei ki khyndew jong ka Riad, Kur, Ri kynti, bad kiwei kiwei ki rukom ia kaba leh se la don kam ia ka ain kaba kyrpang ban don namar kane ka rukom bat khyndew ka iapher na kiwei.
Kane ka phang ka long kaba ktah bha ia ka rukom bat khyndew ha kane ka jylla, dei na kane ka daw ba na ka liang jong u Co-Chairman jong ka MSPB u la khot ia kane ka jingialang ban ia mir jingmut kumno ban leh ha kaba ia dei bad kane ka bynta bad kin ia ai jingmut khnang ba ka MSPB kan lah ban ai jingmut sha ka sorkar ha kaba ia dei bad ka rukom register ia ki jaka.
Kumba ka long mynta ka rukom register ia ki jaka ki don bun rukom, ha ki rangbah shnong, ki sordar, ki Elaka, ki District Council bad sha ki ophis jong ki DC, kane ka jingialang kala ia mir jingmut ha kaba ia dei bad kane ka bynta ba kumno dei ban leh khnang ba kan nym ktah ia ka riti dutur bat khyndew.
