Ma
wkyrwat, Nailar 15: Kum u Kongsan jong ka lympung їamir jingtip ba la pynlong da ka Sngap Syiem College, Mawkyrwat ryngkat ka jingїatreilang ka Khasi Authors’ Society kaba long ha ka 11 tarik Nailar 2018, u bah Renikton Lyngdoh, MLA ka Mawkyrwat Constituency u la ong ba ngi donkam їa ka jingkyrshan jong baroh ki nongshong shnong ka bri u Hynñiewtrep, kynthup їa u Khynriam, u Pnar, u Bhoi, u War uba long u paid Khasi baїar.
U la kyntu ruh їa ki seng treimon sngewbha, ki sengniam, ki skul, ki kolej bad kyrpang їa baroh ki 36 ngut ki MLA ban їasnohkti lang bad ka KAS ha ka jingїaleh jong ka ban pynrung їa ka ktien Khasi ha ka Khyrnit Baphra ka Riti synshar ka ri India.
Ha kane ka lympung, la їoh ruh їa ka jingkren na u Symbud Kongsan u bah Hadrian Lyngdoh u MDC ka thaiñ, uba la kubur ba ka por ka ih bha ba ka Sorkar kan shimkhia noh ban pynurlong їa ka jingdawa jong ka KAS kaba la їaid mynta 39 snem lynter.
Kum u MDC u la ong ba un sa їasyllok bad u CEM ka KHADC ban kyntu їa ka Sorkar jylla ba kan shim noh їa ka rai ban kyrpad їa ka Sorkar Pdeng ban pynrung noh їa ka ktien Khasi ha ka Khyrnit Baphra khlem da pynslem shuh.
U President ka KAS, u Dr. D. R. L. Nonglait u la ban jur ba ka Sorkar Jylla ka dei ban rah noh mardor їa kane ka jingdawa sha ka Sorkar Pdeng. U la kdew ba haduh mynta ki jait ktien kiba la kynthup ha ka Khyrnit Baphra ki don 22 tylli, ka ktien Khasi, u la ong ka dei ban bat їa ka kyrdan ba 23 ha ka Khyrnit Baphra ka Riti Synshar ka ri India. Lada ka Sorkar ka їai buhteng, u la ong kan pynmong jur їa ka jingsngew u paidbah ka bri u Hynñiewtrep.
Kiwei pat ki riewshemphang kiba la kren ha katei ka lympung ki kynthup їa u Dr. S. Lamare, Dr. S. S. Khongkliam, Dr. K. D. Ramsiej bah Andrias Sun bad bah P. R. Kharshiing nalor kiwei pat. La nang pynshitrhem ruh їa katei ka lympung da ka jingrwai na ki samla pule jong katei ka kolej ha ryngkat ka jingsakhi lang na ki nongїalam niam, ki sengbhalang, ki nongsynshar shnong kiba la їashim bynta shitrhem ha katei ka lympung їamir jingtip.
