Shillong, Iaiong 06:
U myntri rangbah ka jylla u Dr Mukul Sangma u la khot ia ka jingialang jong ki heh sorkar ban ia kren halor kane ka jingshah lynshop jong ka jylla ha ka mariang ha kine ki sngi ha kaba da ki hajar tylli ki iing ki sem kila shah pynjulor bad ar tylli ki mynsiem briew kila duh ei ha kane ka jingwan ka eriong bad ka jinghap jong u phria.
U myntri rangbah u la kubur ba ka jingjulor kaba la ktah palat ka long hapoh jong ka Ranikor Block hapoh jong ka South West Khasi Hills District bad ka Mawsynram Block hapoh jong ka East Khasi Hills District. Ia kane ka jingialang jong ki heh sorkar la pyniaid da u Chief Secretary u KS Kropha ha Shillong, ha kaba la don u DGP u SB Singh, Principal Secretary Fiance ka kong R V Suchiang lem bad kiwei kiwei ki heh sorkar.
Na ka liang jong u Chief Secretary u la batai ia u Chief Minister halor ka jingshah pynjulor ha ka mariang, ka jingduh jong ki iing ki sem, ki iing skul, ka rep ka riang bad ka jingthut wat ha ka liang jong ka jingsam ia ka bor ding eleltrik. La ong ba ka jingiarap kaba la sam sha ki long iing kiba la shah ktah la leh katkum ki kyndon ba la buh da ka sorkar.
U myntri rangbah u la bethah ia ki heh sorkar bad ki dei ban phah ia ka kaiphot kaba biang sha ki bor jong ki SDMA khnang ba ka jingiarap ba ka sorkar kan ai kan long katkum ka kaiphot jong ka sorkar kham tam eh ha kaba ia dei bad ki iing kiba la shah pynjot.
U myntri rangbah u la bethah ia ki Commissioner jong ki Divisions ba kin peit bha ba ioh dang don ki jaka kiba dang shah ieh namar ba ka jylla ka dang don bun ki jaka kiba shitom ban leit ban wan ba ki dei ban peit ba dei ban da peit bha ban nym ieh shuwa ban ai ka kaiphot kaba khatduh. La bethah ia ki DC ba kin pynlong ia ka jingialang bad ki BDO kiba hap hapoh ka jingpeit ka jong ki bad ba kin long kiba la khreh ban iarap lada don kano kano ka jingjia ha kip or ban dang wan.
