Shillong, Rymphang 13: Ha ka 11 tarik Rymphang, 2024 ha ka por 12:05 shiteng synnia, ki shipai BSF kiba don ha thain khappud India bad Bangladesh ha Hawaitila ki la iohi ia uwei u briew uba iaid lynti sha Lakroh Nala, kaba jan bha bad ka khappud bad ka ri Bangladesh.
Haba ki shipai BSF ki la pynsangeh ia u, u la pynpaw ka jingbym sngewtynnad ia kane ka jingjia bad u la shim ia kane kum ka jingktah ia ka burom shimet jong u namar ba u kam udei u doctor Veterinary ha ka thain. Haba u la shah pynsangeh ha ki shipai BSF, u la sdang ban ring video ia ka thain khappud bad ia ki shipai BSF kiba don ha ka kam.
Hapdeng ki jingkyrpad jong ki shipai BSF ban sangeh ka jingring dur, une u briew um shym la sngap ia ka jingkyrpad jong ki. Hadien kane, utei u doctor veterinary u la mih noh na kane ka jaka da kaba byrngem tyngeh ruh ia ki shipai BSF ba don hapdeng ka kam.
Hadien katto katne por, u la wanphai ryngkat bad katto katne ki nongshong shnong, bad hylla pyrshah ia ki shipai BSF bad ring video ban pynjah burom ia ka kynhun shipai. Ka jingkynnoh jong utei u briew ba ki shipai BSF ki la byrngem ban siat ia u bad pynlaw lyngkhuit ia u kalong ka bym don nongrim bad kaba ialam bakla pyrshah ia ki shipai BSF.
Ki shipai BSF kiba don ha thain khappud ki iada ia ki paidbah kiba sah hajan ki jaka khappud. Kum kine ki jingkynnoh bym don nongrim ym tangba ki buh jingma ia ki shipai kiba trei ha ki jinglong jingman ba jynjar hynrei ka wanrah ruh ia ki jingiakynat kaba lah ban iakiar. Ki jingkynnoh pyrshah ia ka Border Security Force kilong ki bym don nongrim.
Ha kaba iadei bad kane, ha ka 12 tarik Rymphang 2024 ha ka por kumba 4 baje janmiet la pynlong ia ka jingialang ha ophis SDO (Civil) Amalarem ba la pyniaid da u Dr Abhishek Saini, IAS ryngkat u SDPO Amalarem Sub- Division, Dr Seiboklang Buam, SHO PS- Muktapur bad ki heh shipai BSF. Ha kane ka jingialang la pyni ia ki jingshisha jong kane ka jingjia kiba la pynpulom lut ia kine ki jingkynnoh bad kumta la pynbeit ia kane ka kam.
Ha katei kajuh ka sngi ha ka por kumba 5 baje janmiet la pynlong sa kawei ka jingialang, ha kaba la iadonlang u MLA ka thain, Bah Lahkmen Rymbui, Chief Advisor sha ka Sorkar Meghalaya, Additional Home Secretary Sorkar Meghalaya, IG Law & Order ( Meghalaya Police), IG Border bad IG BSF Meghalaya ban iakren shaphang kane ka jingjia.
U Inspector General of BSF Meghalaya, hadien ba u la pynpaw ia ki jingshisha shaphang kane ka jingjia, u la kular ha ka jingialang ba ka BSF ka ieng skhem na ka bynta ka jingshngain jong ka ri wat hapdeng ki jingeh. Ki shipai BSF ki ai ka jingshakri na ka bynta ka ri.
Kumba pynkynmaw ba ka liang jong ka KSU Riwar kala leit ban ujor sha u SDO jong ka Amlarem ia kane ka jingleh ki shipai BSF kumba la kynnoh pyrshah ia u Dr. Shabiboklang Buam ha khappud bad ka Bangladesh.
