Tura, Jylliew 9: ka seng lehnoh United A’chik Liberation Army (UALA) mynta kasngi kala ai khublei khatduh ia ki ktang suloi ha ka jingialang kaba la long ha Tura mynta ka sngi, ki dkhot jong kane ka seng lehnoh kiba la wan ban pyndem ha khmat ka sorkar mynta ka sngi ki don 66 ngut, ia kaba la pdiang sngewbha ia ki da u myntri rangbah ka jylla u Dr Mukul Sangma.
Ha kane ka sngi ki dkhot jong ka UALA hapoh ka jigialam jong u Chairman Novembirth Marak, kila wan ban aiti ia ki tir ia khun jong ki, kiba kynthup ia k1 2 tylli ki AK-47, kawei ka LMG, kawei ka Rocket Launcher, kawei ka suloi shiktang, lai tylli ki pistol, lai tylli ki Grenades, kawei ka Rocket Propeller, 20 tylli ki jong ka AK-47, 10 tylli ki kuli jong ka LMG, bad phra tylli ki pistol.
Da ka jingwan pyndem noh kine ki dkhot jong ka seng UALA ka dak jong ka jingsuk kala sdang ban wan biang ha Ri Lum Garo, kane ka seng lehnoh la sdang ha u snem 2012 bad kala wan sha ka jingiasoi ia ka jingiakren jongsuk ha u Nohprah 2015, bad ki ksiang ki ba la ia don bynta ban wanrah ia ki sha ka jingiakren ia suk ki long u General Secretary , Garo Baptist Convention, Rev. Janang R. Sangma, Pastor, Hawakhana Church, Rev. F. D. Sangma bad Rev. Fr. Januarius S. Sangma katba na ka liang jong ka sorkar pat kiba la don bynta ha kane ka jingiakren ban wanrah ia ki sha ka jingiakren iasuk ki long Chaimran ka MBOSE u ba bat ruh kum u Commissioner & Secretary, ka tand pule u Bah E. P. Kharbhih.
Ha ka jingkren jong u myntri rangbah ka jylla ha kane ka sngi u la ai ka jingiaroh ia kane ka seng kaba la wan sha khmat ban pyndem bad kane ka long ka nuksa ia kiwei ki seng lehnoh ba kin wan sha khmat ban pyndem. U la ong ba ka jingkutlad ka dei ka daw bah ba la pynlong ia ki ban rung sha ki kam lehnoh, u khot u wer ia baroh ban ia treilang ban ban wanrah ia ka jingsuk.
Haba kren halor ka jingkynnoh ba ka sokar kam shym la leh ei ei na ka bynta ki lehnoh kiba la wan ban ia kren ia suk bad ka sorkar, kumba la pynpaw da u Chairman ka UALA u Novembirth Marak, hynrei na ka liang jong u myntri rangbah u la ong ba ka sorkar ka leh ia kano kano ka kam ka leh haba shai khlem da buhrieh ei ei na ka bynta ban wanrah ia ka jingsuk kaba neh ha katei ka thain. Ia kum kane ka jingle ka sorkar dei ban pynbut ha baroh kawei ka jylla bad ki jylla kane ka thain shatei lam mih ngi namar ki kam lehnoh ka dei kaba ktah lang ia baroh ha kane ka thain.
U myntri rangbah u la ai ka jingkular ia kine ki lehnoh kiba la wan aiti mynta ka sngi ba kim dei ban duh jingkyrmen namar ka sorkar kan airap ia ki ryngkat ka jingbitin lynti ha baroh ki liang. Haka jingkren jong ka kong Roshan Warjri kala kyntu ia kine ki dkhot ka UALA kiba la wan pyndem mynta ka sngi ba kin nym peit shuh sha dien hynrei ki dei ban peit ia kaei kaba nangne sha khmat. Ka ong ba to ai ka jingsuk kan wan ban shynshar na ka bynta ban wanrah ia ka roi kapar ha baroh ki liang.
U Chairman barim jong ka seng HNLC uba mynta u long u MLA jong ka Mawhati constituency, u Bah Julius K.Dorphang u la kren halor ka jingshem jong u ha kip or ba la leitnoh bad u la ong ba ha dien ba u la wan ban aiti noh sha ialade sha ki bor jong ka ain u la ioh ban mat kaei ka jingsuk bad u la kyntu ia kine kiba la wan ban aiti mynta ka sngi da ki ktien sneng ktien khraw ia ki.
U Chariman jong ka kane ka seng ba la pyndam noh ia ka u Novembirth Marak u la iathuh ia ka jingthmu jong kane ka seng ha kaba seng ia ka bad kumno kila shim ia ka rai ban pyndam noh ia ka, u la ai khublei ia kane ka sorkar kaba la ialam da u Dr Mukul Sangma bad ia u ksiang jong ka sorkar bad kiwei ki ksiang kia la don bynta ban pynpoi ia ki sha ka jingiasoi ia ka soskular iasuk
Ha kane ka sngi u Bishap jong ka Tura u Rt. Rev. Andrew R. Marak u la kren halor kajingwanphai jong ki sha iing, u ev.Janang R. Sangma , u la kren halor ka jingiatylli bad ban pynneh ia ka jingsuk katba u Rev. G.B.R.Marak bad Rev. Fr.Januarius S. Sangma kila duwai ban pan ia ka jingkyrkhu jong u blei, ia kane ka jingialang wan aiti kine ki dkhot ka UALA la pyniaid da u Deputy Commissioner ka West Garo Hills u Prabin Bakshi.
