Shillong, Iaiong 07: Ka jylla Meghalaya kan sa jied ia ki ar ngut ki MP sha ka iing dorbar Lok Sabha ha ka 9 tarik mynta u bnai. Na ka liang jong ka sorkar ka la dep ban pynkhreh bad shim ia ki lat ki lynti baroh ban peit ba ka election kan lontg kaba iaid beit.
U Chief Secretary u Bah BPO Warjri, haba kren ha ki nongthoh khubor mynta ka sngi u la ong ba ka sorkar ka la pynkhreh, ryngkat ki lad jingiada baroh ban peit ba kane ka election kan long kaba iaid beit iaid ryntih.
La iathuh ba na ki 11 tylli ki District ha ka jylla, u la leit ban jngoh ia ki 7 tylli ki district, san tylli ha Garo Hills bad ar tylli ha Khasi Hills. Ha kane ka jingleit u la leit ban ia kynduh ia ki bor ba dei peit ia ki District bad ha kane ka jingiakynduh la shem ba kila pynkhreh ha ka rukom kaba janai.
U Director General jong ki pulit u Bah Peter James Henaman, uba la don lang ha kane ka jingiakynduh ia ki nongthoh khubor u la ong ba ki jaka ba don jingma ha kane ka sngi thep vote ia kaba kila buh ki don haduh 343 tylli bad kiba lah ban mih jingia kajia ki don 375 tylli ki polling station.
Bun na kine ki jaka kiba don ha ka jingma kaba khraw ki dei ha Garo Hills bad khamtam eh ha kito ki District ba don ki kynhun seng lehnoh, kum ka South Garo Hills, North Garo Hills, East Garo Hills, West Khasi Hills bad South West Khasi Hills District.
U Chief Secretary u la ong ba na ka liang jong ka sorkar ka la dep shim ia ki lad ki lynti baroh ban ai jingiada ha katei ka sngi ba kan long ka election kaba iaid beit bad u la kyrpad ia ki paidbah ba kin ia mih ha katei ka sngi ban thep ia ka vote ka jong ki namar ka dei ka hok ka jong ki.(SP News)
