Shillong, Naitung 28: Kum kiba la buddien ia ka MHIS Phase -1 bad Phase -II, bad mynta ka Phase -III, ka Dorbar Ki Khlieh Nongsynshar Ka Ri Hynniewtrep, ka kyntu jur ia ki Dorbar Shnong, Dorbar Raid, ki Dorbar Kur, bad ki paidbah ba kin shim khia ban pynrung ia ka kyrteng da kaba siew tyngka 50, lane ban pynthymmai ia ka kyrteng hapoh ka Scheme MHIS-III.
Ka Meghalaya Health Insurance Scheme kaba dei ka Card jingiada na ka bynta baroh ki long iing na ka bynta shi snem, ha kaba iadei bad ka koit ka khiah, kane ka scheme ka long ka jingkyrkhu bad ka lad jingiada ia baroh namar ka long “universal” baroh ki paidbah ki lah ban ioh ia katei ka jingiada kaba haduh tyngka 2,80,000 bad ia ki riew tymmen ka long sa tyngka 30,000 na ka bynta ki long iing.
Katei ka MHIS Card lah ban pyndonkam bad jied ia ka Hospital kaba ki kwah ban leit phah sumar katkum ka kyrteng hospital private bad Sorkar kaba la buh hapoh jylla Meghalaya bad shabar jylla. Ka Dorbar Ki Khlieh Nongsynshar ka kyntu jur ia baroh ki balang ki seng niam ban shim khia halor ka MHIS -III.
La kyntu jur ia baroh ki 3363 ki kur katkum ka khana samri 1980 bad khamtam ia ki nongmihkhmat kur ba kin sngewbha ban shim ia ka jingkitkhlieh ban wad bad ban pynrung ia la ki para kur hapoh katei ka jingpynrung kyrteng kaba lai ka MHIS -III. Lada don ki bym sngewthuh ia katei ka scheme kin sngewbha ban pyntip phone ha u numbor 9436102663 ba ngin ioh ai jingshai halor katei ka scheme.
