Shillong, Rymphang 27: U Myntri ba dei peit ia ka khyndew ka shyiap jong ka sorkar u bah Kyrmen Shylla haba jubab ia ka jingkylli u bah Ardent Miller Basaiawmoit la ong ba ia ki jaka ka sorkar kala ai sha ki 2426 ngut, kynthup ia ki tnad sorkar, ki riew shimet bad sha ki kynhun.
Haba jubab ia ki jingkylli ha kaba ia dei bad ka jingdie jong ki briew kiba la ai ia ka jaka jong ki sha kaba don ha R R Collony, u myntri la ong ba ia kane la leh katkum ka Assam Land Regulation Act 1886, la ong ba ka sorkar ka ai ia ki jaka katkum ka jingbiang ki kot ki sla.
Haba ia dei bad ka jingai ia ki jaka ka long ruh katkum ka Land Transfer Act jong ka sorkar jylla, haba ia dei bad ka ong ba ki dkhot ka iing dorbar ki don jaka ia kata na ka liang jong ka sorkar kam don jingtip.
U myntri la ong ba ia ki jaka sorkar yn nym lah ban leit sha ki riew shimet bad ka sorkar kan ia da ruh ia ki jaka ki bymhap ki jaka jong ka sorkar, ha ki jaka bala ai da ka sorkar ki nongshimwai ki lah ban tei ia ki iing pa ki dulan.
Ki jaka sorkar kiba la ai sha ki riew shimet, ki tnad sorkar bad sha ki kynhun bapher bapher ka long 37,372.9468 hakter bad ka jaka sorkar kaba don baroh ka long 38, 181.9468 hakter.
