Shillong, Iaiong 27: Ka por ka dawa ia ki bor Sorkar Meghalya bad North East, ban pyrkhat thymmai ban btin bad ban plie lynti ban thaw ia ki kharkana bording kiba rit (Mini) na ki um ki wah rit, bad lyngba ka kharkana thermal lane ki kharkana solar, kiban buh bad shna lyngba ka jingiatreilang bad ka office ki Hima Khasi States, ha ki Hima Syiem, Lyngdoh, Dolloi, Sirdar, Lyngdoh, Nokmas, ha ki Khyndew Kur, Ki Jaka shimet, ha ryngkat ka jingiatrei lang ka tnad power dept, ki riew shimet, ha baroh kawei ka jylla Meghalaya.
Ki hydro project kiba heh ki shim por palat ban pyndep ( Shim por 6 haduh 10 Snem), bad bun sien ki kynduh mawsiang namar ka jinglut kaba palat bad teng teng ki kynduh jingeh na ki jingiaknieh khyndew ha ka land aquisition ban ioh jaka ban shna ia ka power project.
ka Sorkar Jylla ka dei ban plie lad ia ki kharkana kiba rit (mini-hydro, solar, bad thermal, ‘LYNGBA’ ki bor Hima Syiemship, Lyngdohship, Sirdarship, Dolloiship an Nokmaship, kum shibynta ban iarap pynnmih bording lyngba ki um ki wah rit kiba don hapoh u pud u sam ki Hima/Elaka.
Ha ka juh ka por ngi dei ban sngewthuh ba kam don ka lynti kaba suk (no short cut).
Ka donkam ia ngi ka Sorkar bad ki paidbah ban buh ka thong kaba shai ha kaba iadei bad ki kam bording, khlem da pynduh ia ka hok jong ki riewlum bad ki trai khyndew, bad ki Hima.
Baroh ki kharkana ba heh (Major Industries) hapoh ka jylla kiba khlem siew bill (defaulters) ki dei ban wan shakhmat ban pynbeit kyrkieh ban siew ia ki jingsah teng ka bill light jong ki hapoh ka por kaba yn ia pynbeit lang ha kaba shai namar ki ioh ia ki state bad central subsidy, ha baroh ki liang kynthup ka khajna bad ka transport subsidy.
La donkam ia ki bor Sorkar Jylla ban shim khia ban pan ia ka Grant kaba kyrpang na ka bynta ka tnad bording, ban ioh pynkhuid ia ka ram Sorkar ha kaba iadei bad ka bording.
Um don One Way traffic, ka donkam ruh ha ka sain pyrthei ban ioh ka synshar khadar kaba khlain kaba khuid ban ioh ban set ia baroh ki thliew kiba pei ha ki bynta jong ka lum khajna Sorkar.
Shuh shuh donkam ruh ka Sorkar hapoh Jylla kaba iaineh khnang ban ioh ban pyntreikam ban buddien ia ki policy treikam, bapher bapher, kum shibynta ban ioh khring ia ki nong wan seng kharkana bording, namar ka long kaba eh ban khring nonwan seng kharkana bording, khamtan, haba ngi phai sha ki por ba la dep namar ka jingkylla sorkar man ka por ki kylla ki policy treikam haba wan sorkar thymmai.
Ka por ka dawa ia baroh ban iatreilang da ka jingshai ym ba ngin ia tynkhuh bad sahkut ha ki kam.
Ka por ka dawa ruh ban ioh ka jingiakren kaba shai na baroh ki liang ban iohsngew ia ki ‘jing ai jingmut’ ban ioh ia pynbeit ia kane ka jingeh kaba ngi kum ki nongshong shnong ka jylla Meghalaya, bad ki paid North East ngi ia kynduh mynta ha kaba iadei bad ka jingdonkam bording.(SP News)
