Shillong, Jylliew 20: U Bah CB Syiem secretary jong ka Ri Bhoi District Congress Committee (RBDCC) ha kajuh ka por u ba dei ruh u dkhot ha ka Meghalaya Pradesh Congress Committee (MPCC) u la ong ba ki lai ngut ki MLA ka congress na Ri Bhoi, u Bah DD Lapang, Dr C Lyngdoh bad u Bah Ngaitlang Dkhar ki dei ban mih noh na kane ka sorkar jong u Dr Mukul Sangma.
Haba kren ha ki nongthoh khubor mynta ka sngi ha Shillong Press Club, u Bah Syiem u la ong ba “ Lada kine ki lai ngut ki MLA na Ri Bhoi ki ieit ia ka jaidbynriew ki dei ban mih noh na kane ka sorkar jong u Dr Mukul, bad lada ki dang iai bteng ban kyrshan ia kane ka sorkar ka mut ba kim ieit jaidbynriew”. U la ong
Ha kane ka sngi la pynbna ruh ba u la dep ban phah ia ka shithi iehnoh kam kum u Vice Chairman jong ka State Level Public Grievances Committee kane ka jinghiar shuki ka jong u ka long ban pyrshah ia ka jingtrei kam jong u myntri rangbah ka jylla u Dr Mukul.
U Bah Syiem u la kynnoh ba u Dr Mukul u la synshar donbor ha kaba ym shym la sngap iano iano ruh bad kane ka dei na ka jinglap ka jong u ha kaba ki ai ia ka kaiphot na ka liang jong ka SLPGC ha kaba ia dei bad ka jingsniew jong ki surok ha kane ka jylla haba ki ai ia ki kaiphot na ka liang jong ka sorkar kam shym leh ei ei ban pynbha ia ki.
U la ong ba ia ka skhim sericulture kaba dei ban don ha Ri Bhoi la rah noh sha Ampati, u la kynnoh ba kane ka sorkar jong u Dr Mukul kam shym la leh ei ei na ka bynta ka jylla hynrei baroh ki skhim la rah sha Ampati la kynnoh u Bah CB Syiem CEM barim jong ka JHADC.
