New Delhi, Nailur 19: Ka ‘Cabinet Committee on Economic Affairs’ jong ka sorkar pdeng hapoh ka jingialam jong u myntri rangbah duh jong ka Ri Narendra Modi kala rai ban pynkiew noh ia ka bai trei jong ki nongtrei ha ki Aganwadi, kiba trei ia ka kam sam jingbam lyngba ka skhim Integrated Child Development Services (ICDS) Scheme.
Kane kan trei kam naduh ka 01. Risaw 2018 bad kane kan neh haduh ka 31.03.2020 bad ka jinglit ba ka sorkar pdeng ka hap ban bei na ka bynta kane ka long haduh T. 10,649.41 klur tyngka. Ki ban wan ia kane ka jingmyntoi kin long haduh 27 lakh ngut ki nong trei kiba trei ia ka kam sam jingbam.
Ia ki nongtrei Aganwadi la pynkiew na ka T.3000 tyngka sha ka T.4500 tyngka, ia kiba iarap la pynkiew naka T.2250 tyngka sha ka T.3500 tyngka bad ia kiba iarap ha kane ka kam sam jingbam la pynkiew ia ka jingsiew na ka T.1500 tyngka sha ka T.2250 tyngka.
Lah ban pynkynmaw ba ia ka bai trei jong ki nongtrei ha ki Aganwadi la pynkiew ha u snem 2011, na ka daw jong ka jingkiew ha ka iew ka hat na ka liang jong ka sorkar pdeng kala shim ia kane ka rai ban pynkiew noh ia ka bai trei jong kito baroh kiba don ha ka kam sam jingbam lyngba ka ICDS.
