Shillong, Jylliew 16: Ka Khasi Students’ Union (KSU) Central Executive Council ka pynpaw ia ka jingsngew thamula halor ka jingkren laplah u Chief Minister ka jylla U Mukul Sangma ban pynpoi lynti rel haduh Sohra. Ka seng ka sngew ba u myntri rangbah ha shwa ban kren ia ka lynti rel sha Sohra ne sha Shillong, kaba long kum ki bniat jong u hati ba dang ha khlaw kiba la tyrwa die lypa, hynrei u dei ban kren shaphang ka jingshim por ban ka sorkar ban wanrah ia ki ain bapher bapher ban iada ia ki trai ri trai muluk ka jylla na ka jingshah tyllep ha kiwei pat ki jaidbynriew ba heh paid ba wan na shabar.
Ka seng ka sngew ba ka kamram jong baroh ki nongmih khmat jong ka jylla la ki dei na kano kano ka party, ka dei shwa ban peit pyrman ba ki jaidbynriew badei hok ki trai shnong ka jylla ki dei ban long trai ha la ka jong ka khyndew ka shyiap khnang ba lada ka wan kano kano ka roi ka par kata ka roi ka par ka dei ban ai jingmyntoi kham kyrpang ia ki trai ri trai muluk ha shwa ia ki nongwan buhai shnong kiba wan nabar.
Ka jingwanrah ia ki ain kiba lah ban iada ia ka jingneh jingsah ki trai ri trai muluk ka long kum ka roi ka par kaba iar tam ban kyntiew ia ka jylla baroh kawei. Hadien ba la pyntreikam paka ia kine ki ain da ki kam kiba paw shai, ka sorkar ka lah ban wanrah sa kiwei pat ki jait kam ban pynroi ia ka jylla namar ha kata ka por kine ki kam pynroi kin da pynroi shisha ia ki trai ri trai muluk. Ka seng ka sngew lyngngoh ruh halor ka jingkynnoh ka tnad pulit ia uwei u dkhot ka seng ba u pynmynsaw ia uwei u pulit bad haduh kane ka khyllipmat ka seng kam sngew lah ban pdiang ia kane ka jingpharep ki pulit.
Ka seng ka sngew ba ha ka jaka ba ki pulit kin im sngi ban pharep ne kthong ia ki dkhot ka seng, ki dei pynban ban adkar ha ka rukom treikam ka jong ki bad ban hikai bha ia ki pulit haba ki leit ban khynra ne kem ia ki dkhot na iing, namar kum ban shu pynkynmaw ka seng kan ym lah da leilei ruh em ban pdiang ia ka jingleh donbor ki pulit ha ka por ba ki kem ia u samla Eric Nongkynrih Executive Member, KSU CEC na iing jong u ha Pohktieh ha ka por shiteng miet ha kaba ka la poi haduh u pud ba u hymmen jong une u samla ula shah ktah kti ha ki pulit. Ongt u samla Donald V Thabah general secretary jong ka seng ha ka kywoh.
