Shillong, Rymphang 20: U bah Alexander Laloo Hek myntri ba dei peit ia ka tnad ri mrad haba jubab ia ka jingkylli jong u bah Charles Marngar la ong ba kam don ka jingiarap haba iap ki sniang ia kito kiba ioh ia ka skhim ri sniang lynfgba ka ka skhim ‘Piggery Mission’.
Haba jubab ia ki jingkylli bynrap na ka liang jong u myntri u la ong ba ka jingiap jong ki sniang ha Ri Bhoi District na ka jingpang African Swine Fever ki long 760 tylli, bad ka jingiap jong ki sniang kala long ruh ha kiwei kiwei ki District ka jylla.
Haba ia dei bad kito kiba ioh ia ka skhim ri sniang na ka skhim Piggery Mission ka jingsiew ia ka ram kan long ban pyndep hapoh ka phra snem, halor ka jingong ban iarap kam don lat ban iarap na ka bynta kito ki sniang kiba la iap khamtam kito kiba ioh ia katei ka skhim.
U Myntri u la pyntip hapoh ka iing dorbar ba ha kappor ba ai ia ka skhim sha kito kiba ri sniang la pynshai ba ka don ka insuran ia ki sniang kaba shongdor T.4000/- tyngka u wei u sniang lada rit he heh ruh ka juh ka dor.
Halor ka jinglyli bynrap kaba ia dei bad ka State Animals Welfare Board na ka liang jong u myntri ba u don kam ia ka por ba ia dei bad kane ka jingkylli, na ka liang jong u myntri rangbah haba ia rap ban jubab la ong ba ka sorkar kan wat ki lat ki lynti ban iarap.
U Myntri Rangbah ka jylla la pyntip hapoh ka iing dorbar ba ka sorkar kala dep ban pan na ka skhim PM DevINE ban shna ia ka State Hospital na ka bynta ki mrad ha Hynniewmer bad ka sorkar kala pan T.30 klur tyngka.
