Shillong, Kyllalyngkot 15: Ka Election Committee ba la jied da ka CEC jong ka Khasi Students’ Union (KSU), ban pyniaid ia ka ilekshon kaba XIII sha ka ophis trei kam jong ka KSU na ka bynta ka samoi trei kam 2017-2020, ka pynbna iar lyngba kane ka kyrwoh ba ka ilekshon kan long ha ka 11 tarik u Rymphang, 2017 naduh ka por 8 baje mynstep haduh 3 baje janmied ha Dinam Hall, Jaiaw, Shillong.
Ha kaba iadei bad kane ka phang, kane ka Committee ka khot ka wer ia baroh ki khun samla kiba la ih jong ka bri u hynniewtrep, khamtam na ka liang ki dkhot jong ki unit bapher bapher ka KSU ba kin mih shakhmat ban iakit iabah lem ia ka lyngkor ba khia jong ka KSU nakabynta ka ri bad ka jaitbynriew, da kaba iashimbynta shitrhem kum ki kyrtong ha katei ka ilekshon. Ia ki jingtip ba bniah halor kane ka kam lah ban ioh na ka ophis trei kam ka KSU ha Jaiaw Chapel, Shillong.
U Bah Samuel B Jyrwa Secretary jong ka Election committee, ha ka jingpynlait khubor mynta ka sngi u la ong ba ia ki nomination paper yn sdang ban ai naduh ka 17 tarik u Kyllalyngkot haduh ka 23 tarik u Kyllalyngkot, 2017 naduh ka por 11 baje mynstep haduh 5 baje janmied na ka Ophis trei kam ka KSU.
Naka bynta ban pynpoi ia ki nomination paper kan long naduh ka 20 tarik u Kyllalyngkot haduh ka 24 tarik u Kyllalyngkot, 2017 haduh ka por 5 baje janmied.
Ka jingbishar ia ki nomination paper kan long ha ka 27 tarik u Kyllalyngkot, 2017 ha ka por 4 baje janmied. Ia ki nomination paper dei ban pynpoi ha lane shwa jong katei ka tarik ba la kdew haneng ha u Chairman lane Secretary ka Election Committee.
Ka Election Committee ka bthah ia baroh ki unit, circle bad district unit ban pynpoi ia ki kyrteng jong ki nongjied kaba long 10 ngut na kawei kawei ka unit hapoh ka 31 tarik u Kyllalyngkot, 2017 ha Ophis trei kam jong ka Seng ha Jaiaw.
Ka Committee ka sngewbha ruh ban pyntip ba ka la jied ia ki katto katne ki riew rangbah ki nonghikai bad kumjuh ruh na ka liang ki lad pathai khubor ban long kum ki nongpeit pyrman ia ka jingiaid beit iaid ryntih jong kane ka ilekshon.
