Shillong, Rymphang 07: Ka jingiathep kyrteng na ka bynta ban ia khun ia ka MDC ilekshon sha ki ar tylli ki iing dorbar ka JHADC bad ka KHADC kan kut la shai ka sngi bad ha ka juh ka sngi kan long ruh ka jingbishar bniah ia ki kot ki sla jong ki kyrtong.
Haduh ka sngi Balang baroh kiba la thep kyrteng ki long 112 ngut ha ki ar tylli ki iing dorbar thawain, ha JHADC baroh kila poi sha ka 56 ngut bad ha KHADC ruh kila poi 56 ngut, kiba bun tam kiba la thep kyrteng dei ha East Khasi Hills District.
Kiba kham paw na ki MDC kiba la thep kyrteng ki long u Bah Teinwell Dkhar Chairman ka KHADC, u Bah Ban Basaiawmoit jong ka PDF, u CEM barim jong ka KHADC u Bah Rangkynsai Makdoh bad u bah Pyniaid Syiem nongialam ka NPP.
Na ki MLA barim kiba la thep kyrteng ki long u bah Martile Mukhin, Bah Titosstarwell Chyne, Bah Roniee V Lyngdoh bad na ki MLA kiba la thep kyrteng dei tang u Bah Gigur Myrthong na ka NPP.
