Shillong, Nailur 28: Ryngkat bad ka pyrthei baroh kawei, ka jylla Meghalaya ruh kala rakhe ia ka sngi “Jongoh kai pyrthei” ha kaba u myntri rangbah ka jylla u Conrad K Sangma u la ia don lang ha kane ka jingrakhe kaba la long ha State Convention centre.
Ka phang pdeng jong ka jingrakhe ia ka sngi ‘Jngohkai pyrthei’ mynta u snem ka long, ”Tourism and Digital Transformation” kaba mut ka kam jngohkai pyrthei bad ka jingkylla ha ka rukom phan jingtip.
Haba kren ha kane ka jingialang u myntri rangbah ka jylla u la ong ba ka thong kaba ha khmat eh jong ka sorkar ka long ban ialeh ban kyntiew ia ka roi ka par ha ka jylla, na ka liang jong ka sorkar ka ban jur ba kiba seng kam la jong ki dei ki engine kiba kyntiew ia ka ioh ka kot ha ka jylla.
Kaei kaba ka sorkar ka lah ban leh ka long ba kan wanrah ia ki polisi trei kam bad ia ki jingtei katkum ka jingdon kam , hynrei ban pyniaid ia ki sha khmat don kam ia ki briew ban pyniaid ia ki sha khmat.
Ha kane ka jingialang u myntri rangbah u la ong ba kila shim ia ka rai ba kin jied ia ki briew ban long kum u nongseng jong jong u ne u bnai bad ka sorkar kine kin ioh ia ka jingiarap na ka sorkar bad kane kan long kum ka jingpynshlur ia ki briew ha kaba seng kam la jong.
Haba phai ha ki kam jngohkai pyrthei, u myntri rangbah u la ong ba ka jylla ka don ia ki jaka kiba itynnad haduh katta katta, hynrei kaba don kam ka long ba kumno ban ai jingtip sha ka pyrthei ban kyntiw ia ki jaka jngohkai pyrthei. Kane ka kam jngohkai pyrthei ka don kam ia ka rukom ai jingtip kaba biang bad kila jingpyntip lyngba ki lad phah jingtip kiba dei lyngba ka internet.
Ha kane ka sngi kiba la ia don lang ki long u myntri ba dei peit ia ki kam jngohkai pyrthei, u bah Metbah Lyngdoh principal secretary ka kong RV Suchiang, Director ka tnad jngohkai pyrthei u bah CVD Diengoh, kiwei ki heh sorkar bad ki riew paidbah ki seng bhalang kila ia don lang.
