Shillong, Rymphang 23: Ha dien ka jingiakynduh jong ki heh sorkar ka Ri Bangladesh bad ki heh ka sorkar Meghalaya kaba la long ha Shillong ban ia kren halor u pud u sam ha pdeng ka India bad ka Bangladesh ha ki bynta jong ka jylla Meghalaya, kala don ka jingwan rung ki shipai jong ka Bangladesh sha ka shnong Muktapur kaba hap hapoh jong ka West Jiantia Hills District ban ong ia ki nongshong shnong ba kim dei ban shna iing lane ban pynbha iing namar kane ka jaka ka hap hapoh 150 kam na khappud.
U Bah Kmen Myrshiang Genenral Secretary jong ka CCIB haba kren ha u SP News Agency u la pynpaw ia ka jingsngew kyndit ban tip ia kane ka jingjia bad u la ong ba kane ka jingle jong ki Border Guard of Bangladesh (BGB) kala pynkyndit ia baroh ki shong shnong kane ka shnong Muktapur kaba don ha khappud bad ka Bangladesh, u la ong ruh ba kumno kine ki shipai jong ka Bangladesh ki lah ban leh ia kane ka kam.
La batai ba kine ki shipai jong ka BGB haba kila rung ha kane ka shnong kila ong, khamtam ia u rangbah shnong u ba dang shna iing ba kim lah ban maramot ia ki ing ki sem jong ki, ne kin shna thymmai namar kane ka hap hapoh jong ka 150 kam lane kata kaba ki khot 150 yard na u pud u sam hapdeng ka India bad ka Bangladesh. La ong ba kane ka jingle jong ki shipai ka Bangladesh ka la buh ia ki paidbah ha pdeng ka jingshong syier.
Na ka liang jong u Rangbah shnong ka Mutapur u la iathuh ba ha kane ka por ba ki shipai jong ka BDB ki ong ia kane la don lang ruh ki heh jong ki BSF bad na ka liang jong ki BGB kila kren shai kdar ba hapoh 150 yard ym dei ban shna kano kano ka jingtei, la ong ba ki iing kiba dang shna thymmai ha kane ka shnong mynta ki dong kumba phra tylli ei ei.
Halor kane ka jingleh jong ki BGB na ka liang jong ka shnong kala leit ban ia kynduh ia u Company Commandant ba don ha katei ka jaka bad kala don ka jingiakren ia sngewthuh ba na ka liang jong ki BSF kim don kano kano ka jingujor ia kane ka jingshna iing ki paidbah ha katei ka shnong.
Na ka liang jong u SP jong ka West Jiantia Hills haba la kylli halor kane ka jingleh jong ki BGB hapoh katei ka shnong Mutapur u la ong ba na ka liang jong ka ophis kam shym don kano kano ka jingtip.
