Shillong, Jylliew 9: U MP jong ka Tura u Conrad K Samgma mynta ka sngi u la leit ban ia kynduh ia u heh jong ka Niti Ayok ban ia kren halor ka pisa kaba la pynlait da ka sorkar pdeng sha ki lai tylli ki District Council ha kane ka jylla Meghalaya.
Ha kane ka sngi u Conrad u la ia kynduh ia u Jitender Kumar u heh jong ka Niti Ayog u ba dei u nongaibuid ia ka sorkar Meghalaya, ha kane ka jingiakynduh u Conrad u la ong ba ka sorkar Meghalaya haduh mynta kam pat pynlait ia ka pisa sha ki District Council.
U Conrad u la ong ba ka sorkar pdeng kala pynlait ia kane ka pisa ha ka 18 tarik jong u bnai Rymphang mynta u snem kaba lakot sha ka T.270 klur tyngka hynrei ka sorkar Meghalaya haduh mynta kam pat pynlait ia kane ka pisa sha ki District Council.
Ha kane ka jingiakynduh na ka liang jong u Kumar u la pynpaw ia ka jingsngew lyngoh ka jong u ba ka sorkar Meghalaya kam pat pynlait ia kane ka pisa sha ki District Council, na ka liang jong u kumar u la kular ia u MP ka Tura ba na ka liang jong ka Niti Ayok kan sa leh ei ei halor kane bad yn sa kren ia ka sorkar Meghalaya ba ka dei ban pynlait noh ia kane ka pisa kham kloi.
