Shillong, Rymphang 25: Ka Kynhun Synjuk ki Rangbah Kur ka Bri u Hynniewtrep (KSRKBH) hapoh ka jingialam jong u president ka seng u bah HS Shylla kila ia kynduh ia u Lat jong ka jylla u Tathagata Roy ban ia kren halor ka Khasi Social Custom of Clans (Adminstration) Bill, 2018 kaba la pdiang da ka iing dorbar jong ka KHADC ia kaba ym pat ioh ia ka jingmynjur na u lat halor kane ka Bill.
Haba kren ha ki lad pathai khubor ha dien bala ia kynduh ia u Lat jong ka jylla Meghalaya u Tathagata Roy, u la ong ba kane ka jingiakynduh bad u Lat ka jylla kila ai ia ka dorkhas ha kaba ia dei bad ka jingkwah ba u lat ka jylla yn ai noh ia ka jingmynjur jong u ia ka Khasi Social Custom of Clans (Adminstration) Bill, 2018 bad na ka liang jong u lat ka jylla u la ai ka jingkular ban shim khia ia kane ka kam.
Kane ka jingwan ia kynduh ia u Lat ka jylla ka long ban kyntu ia u Lat ka jylla ba un shim kyrpang ia kane ka Bill, namar ki kwah ba kawei pa kawei ka kur kan don ia ka seng kur bad na ka liang jong u Lat ka jylla u la ong ba u sngewthuh bha ia kane ka kam bad u la ai ka jingkular ba yn sa peit kyrpang ia kane ka Bill.
U Bah Shylla u la ong ba kumba ka long mynta kum ka jaidbynriew baroh ki kur ki don palat ia ka 5000 tylli bad lada u Lat ka jylla u ai noh ia kane ka jingmynjur kan long kaba bha na ka bynta ki kur ban kin don noh ia la ki jong ki seng kur namar ka KHADC ka kwah ba kin register namar kum ki kur kiba don ia ka seng kur ki don duna bha.
Na ka liang jong u nongialam jong ka SRKBH u la ong ba lada don kiba wohnia ia kane ka dei tang ka jingkwah ban who nia, namar kumba ka long mynta la lah ban shim jaid tang da ka ba shim ia ka aphidabit na iing kashai ban khanglad ia kane mano ba lah ban wohkjat laitnoh tang na ki rangbah kur.
Kane ka jingleh onlie ban apply ia ki Schedule Tribes ka plie ia ka lad ia kiwei ki jaidbynriew ban ioh ia ka ST sertiphiket da kaba ioh ia kane ka ST ki lah ban ioh shibun ki jingmyntoi wat ban ia leh ilekshon ruh. U la ban biang kito kiba woh kjat dei tang kito ki bym iohi ia kane ka jingjot kaba ka jaidbynriew ka mat lada kim don ki seng kur.
