Shillong, Nohprah 01: Tang hapoh 22 sngi ba la pynbna da u myntri rangbah duh jong ka Ri u Narendra Modi ban pynduh noh ia ka pisa T.500 bad T.1000 tyngka, u soh jong ka jingiakhun pyrshah kila sdang ban paw ha kane ka jylla Meghalaya kaba la shah ktah ha ki kam lehnoh khmatam ha Ri Lum Garo.
Ki pulit jong ka South Garo Hills kila peitngor bha ia ka jingthep pisa jong ki riew paidbah ha ki Bank ha kine ki sngi, da ka jingtrei shitom jong ki pulit la ioh ban kem ia u Sengchang Momin bad ia u Solly Sangma bad na ka Bank Account jong ki la lap ba ka don ka pisa T.28 lak tyngka ha Tura.
Ha ka jingtohkit jong ki pulit kitei ki ar ngut kiba la shah kem kila phla ha ki pulit ba kane ka pisa kaba kila leit ban thep ha Bank ka dei ka jong u Area Commander jong ka seng GNLA u Baichung. Ki pulit kila ioh ba kem ia kine ki ar ngut na Tura mynta ka sngi.
Na ka liang jong ki pulit kila thoh sha ki Bank ba ki dei ban pynduh noh ia ki account jong kine ki briew katba ka jingtohkit ka dang iaid. Ban pynkynmaw ba ki pulit jong ka East Garo Hills kila ioh ban kurup haduh T.35 lak ka pisa jong ka seng GNLA ha ka 17 tarik jong u Naiwieng.
Ha kajuh ka pork a sorkar pdeng ruh kala bthah ia ki paidbah ba kin nym shah ia ki briew ban thep pisa ha ka account jong ki , la bethah ruh ia baroh ki Bank ba la don mano mano ba wanthep pisa sha ki Bank ba donkano kano ka jingsuba ki dei ban pyntip sha ki bor pulit.
La kyntu ia ki paidbah ruh ba kin long kiba husiar bad ba kin nym shah ia kino kino ki briew ban thep pisa klumar ha ka bank account ka jong ki.
