Shillong, Risaw 11: Ka jinglehniam Durga Puja kaba juh long shisien shisnem kala kut mynta ka sngi ha pdeng ka jingsuk jingsain hapdeng ka jingpahara jong ki bor pulit ha ka jylla baroh kawei.
Mynta u snem baroh ki pandal ha ka jylla ki don haduh 166 tylli ia kiba la pynieng ha ki jaka bapher bapher ha kane ka jylla, kiba bun tam ki dei ha East Khasi Hills, hapoh jong ka nongbah Shillong 67 tylli, bad ha ka district baroh kawei ki don 92 tylli. Ha Ri Bhoi 11, ha Garo Hills 54 tylli ha Jaintia Hills 9 tylli bad tang ha Tura ki don 24 tylli.
Ia kane ka jinglehniam Durga Puja mynta u snem la leh burom hapdeng ka jingkmen jingsngewbha, ha kaba ki paidbah kila ia leit ban jngoh na kawei ka pandal sha kaweipat bad ia kali sorkar, ki Bus JNURM la bthah ia ki ba kin kamai kham palat ia ka por ba la buh ban kit ia ki paidbah nongleit nongwan ha kane ka por leh kmen.
Ka jingpynngam ia ki blei thaw la pyndep mynta ka sngi ha kane ka jylla Meghalaya, bad kane kala iaid beit iaid ryntih khlem da don kano kano ka jingpynwit. Na ka liang jong u Lat ka jylla u V Shanmuganathan bad u myntri rangbah ka jylla u Dr Mukul Sangma ruh kila ai khublei kyrpang iaki paidbah ha kane ka leh niam Durga Puja mynta u snem.
