Shillong Rymphang 26: Mynta ka sngi kala don ka jingjia kaba sngewsih ha kaba kawei ka trok kaba kit ia ki nongleit jingiaseng kala leit ban tynrah ia ka kynroh rel ha ka jaka ba la tip kum ka Jadokrah ha jan Sohpian bad ha kane ka jingjia ba sngewsih shiphew tylli ki mynsiem briew kila duh ei ia la ka jingim bad bun kiwei kila mynsaw.Ia kiba mynsaw la pynkit marmar sha Nongstoin Civil Hospital.
Katkum ki jingtip la ong ba kane ka trok ka mih na ka shnong Mawlum, thain Mawlangsu ban leit sha ka jingiaseng KJP Synod jong ki samla ha ka shnong Nonglang, hynrei ynda poi ha kane ka jaka ba long khongwain bha ka surok Shillong –Nongstoin ia kaba la tip kum ka Jadokroh ha neng Sohpian kaba jngai kumba 18 KM na Nongstoin kala leit ban tynrah ia ka kynroh rel.
U Additional Deputy Commissioner jong ka West Khasi Hills u PD Sangma haba kren ha u nongai khubor u la ong ba ka dei ka jingshisha bad la phah ia u Magistrate ban leh ia kaba don kam, na ka liang jong u SP jong ka West West Khasi Hills ruh u la leit sha ka jaka ba don kane ka jingjia ba sngewsih ban pynlong ia ka jingtohkit.
La iathuh ba haduh mynta la ioh jingtip ba kiba la khlad ki long shiphew ngut hynrei ia ka jingtip kaba bniah yn sa lah ban iathuh shai haduh ban da dep ia ka jingtohkit namar ba u Magistrate bad u SP ki dang leit ban jurip ia kane ka jingjia ba sngewsih. Kat haduh bat oh ia kane ka khubor ki bor jong ka District Adminstration ki dang ialeh ban pyndep ia ki jingdon kam baroh katkum ki kyndon jong ka sorkar.
