Shillong, Kyllalyngkot 06: Ka KSU Warsan Lyngdoh Circle ka pynpaw iaka jingsngew lyngngoh haba iohi lyngba ki lad pathai khubor ba u bah Ready Myrthong u la kam ialade kum u General Secretary Circle lem bad ki 4 ngut kiwei pat kiba la pynpaw ba ki la iehnoh iaka seng halor ka roi ka par .
Naka liang ka seng ka pynshai paitbah ba kane ka khubor ka dei tang ka jingpyrshang ban ialam bakla iaki paitbah bad khlem ka jingshisha. U bah Ready Myrthong um dei shuh u General Secretary circle namar la dep weng ia u naduh ka samoi treikam ba la dep bad ki dkhot kim shem la bynshet shuh ia u ha ka post ba u la kam.
Kumjuh ruh ia kine ki dkhot kiba kam lyngba ki lad pathai khubor. Ka jingkam jongki ka long tang ka jingpynthohbria iaka seng namar ka jingshisha ka long ba la dep weng iaki la slem bah naka register jongka seng halor ka jingkyrshan jongki iaka surok ban tih uranium. Kumba long mynta, baroh ki jingtreikam jongka seng bad ki dkhot ba pura jongka Circle ki dang ialong shitylli bad ki dang skhem ha ka nongrim ban pyrshah uranium bad iaka surok ban lam sha kata.
Shuh shuh ka seng ka ai khublei iaki paitbah ka thain Warsan Lyngdoh kiba la kyrshan borbah iaka seng halor ka jingpyrshah iaka surok jongka jingtim kaba dei ka Two lane na Nongstoin sha Mawthabah. Ngi pynpaw iaka jingkmen ba ka KHADC ka la iohi iaka jingma jongki paitbah ka thain ha kaba la weng noh iaka NOC jongka Two lane ka surok ban kit uranium bad la ai bujli daka surok ka ban thew shisha iaka roi ka par.
Ku ka seng ka pdiang iaka surok single lane ba 20 klur da kaba sngewbha bad kumjuh ruh iaka proposal ban phah shna surok sha ki jaka bym pat lait kali jong ka thain. Kane ka kyrwoh na u samla L.D Mashra, Publicity Secy. KSU Warsan Lyngdoh Circle.
