Shillong, Nailar 29: Ka Khasi Students’ Union (KSU) kala pynpaw ia ka jingsngew kyndit ka jong ka, halor ka jingkynnoh jong u Superintendent ki pulit ia ki dkhot jong ka seng ia kaba la jia ha Upper Mawprem ha ka 26 tarik mynta u bnai ha kaba kala don ka jingkawang petrol bomb.
Ha ka kyrwoh kaba la phah mynta ka sngi ka KSU ka pynpaw ia ka jingsngew kyndit halor ka jingkynnoh bad suba u Superintendent of Police ka East Khasi Hills district ia ki dkhot jong ka seng kiba dang shu lait jamin shen na phatok. Ka seng ka buh jingkylli ha kano ka nongrim ba u SP u shu ai kum kata ka jait khubor khlem da pynlong shna ki jingtohkit kiba thikna.
Kane ka jingai khubor ka jong u SP ha kaba u la thew bad kynnoh ia ki dkhot ka seng kiba dang shu ioh jamin ka long ka bym shong nongrim bad kaba shu kren laplah tang ban ioh kynthoh ia ka seng kaba peit ia ka bha ka miat jong ka jaidbynriew Khasi.
Ka seng ka pynrem jur ia kane ka jingkynnoh u SP bad ka dawa na ka tnad pulit baroh kawei ba ka dei ban pynlong shwa ia ki jingjurip bad jingtohkit kiba bniah bad janai ha shwa ban pynlait ia kum kita ki khubor lamler.
