Shillong, Naitung 12: Ki dkhot ka KSU Ranikor Circle bad KSU South West Khasi Hills ha ka Sngi Balang mynta ka taïew ki la leit ban ïa kynduh ïa u Chief Engineer (RE) ka MeECL ban pynkynmaw ha kaba ïadei bad ka jingbympat lah ban pynpoi bording elektrik ha ka shnong Photeitsim.
Ka shnong Photeitsim ka dei ka shnong ba hap hapoh Maharam Syiemship bad ka shong ba la rim bha hapoh Ranikor C&RD Block. Kane ka shnong ka la rung ruh ha ka census naduh u snem 2000-2001 ter ter ha Ka jingdon ki nongshongshnong kumba 30 tnum ki longïing, kawei ka skul bad kawei ïingmane.
Kumba ka long mynta ki nongshongshnong ka Photeitsim ki ïa kynduh jingeh shibun da ka jingpynslem ki bor sorkar ban pynpoi bording ne surok kali haduh mynta mynne, kine ar kiba long ki jingdonkam ba ha khmat eh jong ka shnong ne kano kano ka imlang sahlang, nalor ba ki nongshongshnong kiba bun ki dei ki nongrep. Ka wanrah jingeh ruh bad jingdkoh shibun khamtam haka pule dangle jong ki samla bad ki khynnah shongskul jong kane ka shnong.
Ha kane ka jingïakynduh, na ka liang u Bah M. Shangpliang CE ka Rural Electrification jong ka MeECL u la kular ban shimkhia bad ban sa phah ïa ki nongtrei ban leit jurip ïa kane ka shnong.Kumta ka seng ka ban jur bad khmih lynti ïa ki bor ba dei khmih ban nym pynslem shuh ha kaba ïadei kane bad ka kyntu ruh ïa ki nongmihkhmat kane ka thaiñ ban shimkhia ïa ka khia ka shon bad ïa ki jingeh kiba ki paidbah kane ka shnong ki ïatyngkhuh. Ong u samla Pulljohn Wanñiang assistant education secretary KSU SWKH District ha ka kyrwoh.
