New Delhi, Jymmang 30: Ha ka sngi kaba ar jong ka jingleit jong u sha Manipur, iakren u Myntri Sorkar Pdeng ba dei khmih ia ki tnat Kam Pohiing bad Cooperation, u Amit Shah bad ki kynhun ka imlang sahlang, ki riewpawkhmat, ki riewshemphang, ki ophisarshipai ba la shongthait bad ki ophisar ha Imphal.
U la iakynduhia ka kynhun jong ki nongialam longkmie (MeiraPaibi) ha Imphal. Da kaba ban jur halor ka bynta jong ki longkmie ha ka imlang sahlang ha Manipur, ong u Amit Shah ba lyngba ka jingiatreilang, ngi ieng skhem na ka bynta ka jingpynthikna ia ka shongsukshongsain bad ka jingriewspah ha ka jylla.
U Myntri ka tnat Kam Pohiing u la iakynduh ruh ia ki kynhun ha ka imlang sahlang kum ka COCOMI, AMUCO, AMOCOC, MMW, STDCM, FOCS, Forum for Restoration of Peace bad ki kynhun jong ki samla pule.
Ki kynhun ki la ong ba ki ieng skhem na ka bynta ka shongsukshongsain bad ki la kular ba kin shim ia la ka bynta ban wanrah biang ia ka jinglong jai jai ha Manipur. Shuwa ba un leit sha Churachandpur, u Myntri u la iakren bad ki riewpawkhmat, ki riewshemphang, ki ophisar ka kynhun shipai ba la shongthait bad ruh ki ophisar.
Kine ki kynhun ki la kyntu ia u Myntri ba kin don ki sienjam ban wanrah biang ia ka shongsukshongsain bad ka jing jai jai. U Myntri ka tnat Kam Pohiing u la leit sha Churachandpur bad iakynduhia ki riewpawkhmat bad ka kynhun jong ki kynhun ha ka imlang sahlang.
Ha ka janmiet, la pynlong ia ka jingialang bad baroh ki kynhun ha Imphal. U Myntri Kam Pohiingu la peit ia ka jinglong ka jingshngain bad ki ophisar ka kynhun pulit ka Manipur, ki kynhun CAPF bad ka kynhun shipai jong ka India.
U la ong ruh ba ka shongsukshongsain bad ka jingriewspah jong ka Manipur ka dei ka kam kaba kongsan ia ngi, bad u la hukum ia ki ophisar ban leh da kaba tyngeh ia kanokano ka kam kaba pynthut ia ka shongsukshongsain.
U Myntri Sorkar Pdeng ba dei khmih ia ka Tnat Kam Pohiing un leitjngoh ia ka Moreh bad Kangpokpi jong ka jylla Manipur lashai ka sngi. Un iakren bad ki dkhot jong ki kynhun bapher bapher jong ka thain ha Moreh bad yn pynbud pat da ka jingialang bad ki kynhun ka imlang sahlang ha Kangpokpi. Hadien kane kan don ka jingialang peit bniah ha kaba iadei bad ka shongsukshongsain ha Imphal.
