Shillong, Nailur 08: U bah Ernest Mawrie president jong ka BJP Meghalaya State Unit u la thoh sha ka tnad pla pisa jong ka sorkar pdeng ban dawa ba dei ban phah tohkit da ka Central Bureau Investigation (CBI) halor ki jingkynnoh bamsap bala jyllei hapoh jong ka JHADC bad GHADC.
Haba kren ha ki lat pathai khubor mynta ka sngi ha ophis trei kam jong ka party BJP, la kynnoh ba ka EC jong u bah Thombor Shiwat ha JHADC kala pyndon kam bakla ia ka pisa bala ai da ka sorkar pdeng ia kaba la tip kum ka Special Assistant Grant ha ka jaka ban pyntrei ia ki kam pynroi la pyndon kam pynban ha kaba siew ia ka tulop ki nongtrei haduh T.20 klur.
U bah Mawri u la kynnoh ba kam dei tang katne, kane ka EC ha JHADC kaba don lang ka UDP bad ka NPP kam shym la shimlang ia ki MDC jong ka BJP kiba don lai ngut wat la ki ia don lang ha ka sorkar MDA ha ka jylla, kane ka jingleh jong kine ki ar tylli ki party ka long kaei kaei kaba ym lah ban pdiang.
Haba ia dei bad ka GHADC la kynnoh ba ka jingpyndon kam bakla ia ka pisa SAG kaba la ai da ka sorkar pdeng ka long kaba la palat bad kane la lap lyngba ka RTI kaba kila dep ban pan, ha GHADC ka NPP kaba ialam ia ka EC kam shym la kyntup lang ia ka BJP wat la ki ia don lang ha ka sorkar MDA.
Kaneka SAG ka long ba ka sorkar pdeng ha u snem mang tyngka 2015-16 kala ai sha ka KHADC T.133.12 klur, sha ka GHADC T.100.71 klur bad sha ka JHADC 33.37 klur. Ka jingai ia kane ka pisa ka long ban pyntrei ia ki kam pynroi ha kine ki jaka jong ki riewlum.
Kane ka juh ka jingiapisa kala wan biang ha u snem 2019, ha kaba nyngkong ka KHADC kala ioh T.34.87 klur, ka GHADC kala ioh T.31.40 klur bad ka JHADC kala ioh T.11.62 klur. Kane ka long ha ka sien phah kaba nyngkong, ha ka sien phah kaba ar , ka KHADC kala ioh T.15 klur, GHADC, T. 13.60 klur bad JHADC kala ioh T.5.10 klur.
Ka jingkynnoh bamsap ka long halor ka jinglap ba ia ki kyndon baroh la pynkhein da kitei ki ar tylli ki District Council, ha kaba ia ka jingbit ban pyntrei ia ki kam ha ka jaka ban soi da ki engineer jong ka sorkar jylla la soi da engineer jong ki kiba don ha kitei ki District Council bad ka jingpyndon kam bakla ia ka pisa ha ka jaka ban pyntrei ia ki kam pynroi la pyndon kam ha kaba siew tulop.
Kumba ka long mynta ki nongtrei jong ka JHADC ki khlem ioh tulop mynta la khyndai bnai bad ki nongtrei jong ka GHADC ki khlem ioh tulop mynta la 28 bnai. Na ka liang jong ka party BJP kala dawa ban don ia ka jingtohkit da ka CBI ban pynshitom ia kito ki briew kiba ia don kti ha kane ka kam pyndon kam bakla ia ka pisa paidbah, la ong u Bah Ernest Mawrie president ka BJP.
