Tura, Iaiong 17: katba ka Election kam pat dep la ong ba ka municipal board kaba don ha Garo Hills kila ai wai ia ki khyrdop jong ki ha South Garo Hills. Ki liang pyrshah ki kynnoh ba kane ka jingleh ka dei ka jingpynkhien ia ka kyndon model code of conduct.
Ki tyllong khubor na Baghmara Municipal Board ki ong ba la leh ia kane ka jingai wai ia ki khyrdop ban siew ia kaba dei sha ki nongtrei hapoh katei ka BMB kaba don 120 ngut ki nongtrei kaba dei naduh u Naitung jong u snem 2013.
Ia kane ka tender box la plie halor ka jingbthah jong u TG Momin la kynnoh bad ha kane ka por u deputy commissioner jong ka South Garo Hills, U Chinmay Gotmare. La ong ba ha ka juh ka por u Momin u dei u chief executive officer jong ka Baghmara Municipal Board.
La ong ba u Momin u la ai ia kane ka tender ha dien ba la ioh ia ka pisa kum ka boina hynrei mynta ka sngi la pynduh noh na ka daw jong ka jingpyrshah jong kiba bun bad la ong ba kane ka dei ka jingpynkhien ia ka model code of conduct.
U Momin u la ong ba ia ka jingkhot tender kaba thymmai yn s aleh ha dien ba la dep niew vote, namar kumba ka long mynta ka board ka don hapdeng ka jingkyrduh pisa kaba jur bha.
La ong ba ka BOARD kam shym la lah ban siew ia ka tulop jong ki nongtrei mynta la hynniew bnai ei ei bad ha ka jingshisha kane kam dei ban long kumta la ong u Momin.(SP News)
