Shillong, Jymmang, 4: Ka KHADC naduh ba wan ka PDF ym tang ba ki ai Trading licence thymmai pathar sha ki Non Tribal, hynrei ka Labour Department ruh ka trei kam klumar. Ka HYC lyngba ki jingioh jingtip lyngba ka RTI ka la lap ba ka jingaiwai ban sam Labour Service licence sha ki Riewshimet daka KHADC kala sdang naduh ka 31/July/2009 ha kapor ba long CEM u Bah Manstudy Nongrem. Ha katei ka snem (31/July/2009 haduh 31/july/2010) ka KHADC ka la ai wai ha u Bah B.Nongrum na sohiong ban lum bai Labour Service licence na ki Non Tribal ha ka dor Rs. 100 na ki unskilled, Rs 150 na ki Semi skilled bad Rs. 200 Na ki Skilled labour.
Une u Riewshimet katkum ka work order u dei ban ai jingkhein sha ka KHADC katno ngut u shim bai licence bad u dei ruh ban phah ia baroh ki kyrteng jong ki Non Tribal kiba u la ai labour Service Licence. Kaba pynum dum ka long katkum ka jubab na ka RTI la lap ba ka office jong ka KHADC kam don Record eiei halor kane bad kamtip hiruh katno ngut ki non tribal ki la ioh licence bad katno ngut une u riew shimet u la shim bai labour licence. Ka KHADC kam don record ia ka jingioh lum khajna ha kine ki snem. Kane ka pynpaw shai ba ka la don ka jing bam klop bad ka jingtrei kam thurmur kaba shykhei hapoh kane ka snem.
Ka jingaiwai ban lum khajna na ki Non tribal kiba shim labour service licence ka la sdang biang ynda wan u Bah Donkupar Sumer kum u EM In charge ka Labour Department. Katkum ka jubab kaba la ai da ka PIO jong ka KHADC, ka KHADC ka la ai wai sha arngut ki riewshimet u Bah Felix Kharpuri bad Bah Pynshngain Nongbet ha ka 3/November/2016 ban long ki Nongmih khmat ka KHADC bad ka karam jong ki ka long ba kin iarap ia ka KHADC ha kaban leit khroh leit kjor, leit kyrpad bad leit lum leit lang ( Enrolment) ia ki Non Tribal ba kin wan shim Labour Licence bad kin ioh 5 % kawei ka licence ynda ki lah ban pyngeit ia ki dkhar ba kin shim licence.
Haba kylli lyngba ka RTI ba ha kano ka rukom ka KHADC ka jied ia kine ki agent jong ka ban leit lum dkhar ba kin wan shim labour licence, la kadei lyngba ka biding tender ne da kumwei pat, ka jubab ka long hana “ katkum ka policy treikam jong kane ka executive Committee kaba mynta, la jied ia kine ki riewshimet da kaba ki wan tyrwa hi ban iarap ia ka council”. Ym don inviting notice tender ne kano kano ka jingpyntip lyngba ki notice paidbah ba lait kata ka kam hynrei kita ka riew shimet ki shutip hi bad ki leit tyrwa hi.
Ka HYC ka kynnoh ba la long thik kumba ia kylli samla ki kynnah rit kata ka jingwan tyrwa hi. Kane ka long kaei kaei kabym iahap bad ia kum kane ka jaid policy dei ban pynduh noh. Kumno kine ki shimet kin tip balait kata ka kam lum mynder ban wan shim labour licence, balei ka eh ia ka KHADC ba kin khot tender bad jied lyngba ka open bidding system? Ka jubab ka long ba naduh basdang la shu ialeh sop sop tang ban pynhun ia ki Nongbud jong kine ki MDC.
Ia kine ki labour service licence, la ai da kaba pyntrei kam ia ka United Khasi-jaintia Hills District (Trading by Non Tribals) Regulation , 1954 bad ka jingthmu jong kane ka ain ka long ban iada ia ki trai Ri trai muluk bad ki riewlum ha ka khaii ka pateng bad ha ka bylla ka sngi. Lada bun than ki Non Tribal kiba ioh bylla hapoh ka Ri jong ngi kamut ka pynlong noh ia ki trai muluk ba kin duhnoh ia ka kam ka jam bad ka kamai kajih.
Ka KHADC ka la dei ban tyngkan ban ai labour licence khang ba ki trai muluk kin ioh kam hynrei da khongphong la biah phongrai noh ia ka hok ki nongbylla da kaba ai wai noh iaka jingai labour licence sha ki riew shimet bad da kaba leit khroh leit kjor ia ki dkhar ba kin wan bylla na Ri jong ngi. Ha ka jingshisha ym dei ban enrol ia ki non tribal ba kin wan shim labour licence hynrei ladei ban pyrkhing da kaba pynkhlain ia ki Enforcement ne ban ai bor sha ki Dorbar Shnong ba kin peit ngor ia ka jingwan bylla sahuh ki dkhar ha ka Ri jong ngi hynrei ka KHADC hapoh ka EC jong ka PDF ka leh da khongpong.
Ka ain United Khasi-jaintia Hills District (Trading by Non Tribals) Regulation, 1954 ka ong ba iaki kam balah ban trei da ki trai muluk ym dei ban ai lad ia ki dkhar ba kin trei, hynrei haba kylli na ka KHADC don katno ngut ki Trai muluk kiba dei ki nongbylla ka jubab ka jong ki ka long “NGIM TIP”. Haba kim tip kumno ki nud ban ai labour licence bad kumno kim tip la kita ki Nonbylla trai muluk ki don kam ne em bad kumno kin tip ba ki trai muluk ki lah ne em ban trei ia kata ka kam ba mut trei ki poiwir? Dei na kine ki daw bad dei na ka jingdon ki MDC bad ki EM ki bym kitkhlieh ia ka jaidbynriew kaba pynroi ia ki poiwir ha ka Ri bad kaba ap jingma ia ka Jaidbynriew hi baroh kawei.
Ka Seng lyngba kane ka kyrwoh ka dawa khaduh mynta sa shisien na ka EC jong u Bah Pynshaing N Syiem ba ki dei ban wengnoh ka jingaiwai ban lum khajna ne enrol non tribal ban wan shim labour licence bad ki dei ban pyrkhing ban ai labour licence nangne sha khmat. Lada kim lah ban leh ka seng kan shim noh da ki lad jingiakhih nangne shakhmat. Ong u Bah Robertjune Khar Jahrin ha ka kyrwoh kaba la phah mynta ka sngi.
