Shillong, Lber 05: Ka Khun Hynniewtrep National Awakening Movement (KHNAM) ka dap da ka jingbitar kaba khraw ha kaba ia dei bad ka jingjia ha Ichamati mynsngi Thohdieng bad ka pynrem jur ia ka jingthom bor jong ki riew sniew kat haduh ba la dkhat noh jubor ia ka jingim u Bah Lurshai Hynniewta bad la pynmynsaw ia bun ngut ki khun samla, ki nongialam bad ki dkhot ka Khasi Student Union.
Ka KHNAM ka pynrem jur ia ka jingbym lah ka tnad syntiat ka Police department, namar katkum ki jingioh jingtip, kiba pynklumar dei ba kila pynkhreh lypa da ki wait, kinar rod bad ki lathiwat ha shwa ban sdang ka jingialan kam u president ka KHNAM.
Na ka liang jong u President ka KHNAM u la ong ba ka jingkynnoh iaki samla KSU ka long ka bym shisha bad bymdon nongrim, Ka seng ka pynpaw ruh ia ka jingsngewsih namar ha kiba bun ki khep ba don kum kine ki jingjia ka jingkynnoh ka leit beit sha ki samla khasi katba iaki poiei pat la niew iaki kum ki angel bad ki khun phrang sngi ka sorkar.
Ka seng ka dawa na ka sorkar badei ban kem lut ia kito baroh ki briew ba don kti ha kane ka jingjia ym tang iakitoki 8 ngut namar kat kum ki video clippings la iohi shai kdar ba lajan dap spah kiba ia don bynta.
Ka ne ka jingjia ka ktah mationg shisha kum ka jaitbynriew bad ka kdew shai kdar ba kine ki briew kiba leh ia ka kam sniew ki la sdang ban sngewkhlain kat nangmih ki sngi ki por, la kam u president ka seng sain pyrthei ka KHNAM.
Ki jaka khappud kiba hap hapoh u pud u sam bad ka Bangladesh kum ka Ichamati,Hatmajai bad kiwei kiwei, la iohi shai kdar ia ka jingbun ki nongwan rung beain kala long kaba ima haduh katta katta.
Na ka liang jong u President ka KHNAM u buh ruh ka jingkylli ba balari haduh katne u poiei u la ban buhai shnong ha kine kithain, mano ba ai lad ia ki, na ei ki ioh ki kot ki sla bad ki pynmyntoi iano, kane ka jingkylli kaba hap ban ioh ia ka jubab la ong u president ka KHNAM.
Ka KHNAM ka dawa na ka sorkar ba ka dei ban sdang noh mardor da ka jingtalasi iaki ki kot ki sla jong ki ba wan bylla ban peitngor biang ia ki kot ki sla jong baroh ki bar jylla. Ka ladei ka por ban kine ki thain kin long noh ki ki jaka kiba lait na ka jingwan jong ki briew kiba na bar.
Kidei ban don ki bor pulit ki ba biang ban don ha kine ki jaka, kam myntoi ban pynshang ia ki bo rpulit tang na khmat bad na dien ki nongmihkhmat, phah iaki ban shakri bad iada ia u paidbah u ba la ai bor ia ban don ha kane ka kyrdan.
Ka jingjia ha Ichamati ka la pynbitar ia kiba bun. Ka por kam pat dier la kum ki nongialam shnong, ki paid nongshong shnong, kum ki Hima, Kum ki MDC, kum ki MLA bad ka sorkar ka klet ia ka myntoi shimet bad lada ia trei ia ka kam da ka jingkitkhlieh. Kat nangkloi ka sorkar ban pynkhuid ia kine ki poiwir na kine kithain.
Lada dang shim sting kan wanrah ka jingma kaba khraw. Ka KHNAM ka kyntu ia baroh ban long kiba peitngor, kiba husiar, ha ka juh ka por ka seng ka seng ka phah ka jingsngew lem sha kiba ha iing ha sem jong u bah Lurshai Hynniewta ha kane ka jingduh kaba khraw, la ong u Bah Pyndapborthiaw Saibon president ka party KHNAM.
