Shillong, Rymp
hang 17: Ka Khasi Student Union jong ka thian Ranikor Circle kala kynoh ba ka jingkylla rong jong ka Wah Ranikor ka dei ka jingjurip Uranium jong ka dei na ka jingjurip Uranium jong ka Atomic Minerals Department kaba la ai kontrak sha ka Maheswari Company Private Limited ha ki jaka jong ka Phodkud hapoh jong ka South West KHasi Hills District.
Haba kren ha ki lad pathai khubor kaba la long mynta ka sngi ha Shillong Press Club u president jong ka seng Ranikor Circle u Bah Marcony Thongni u la ong ba ka seng kala dawa na ka sorkar jylla ba ka dei ban bethah mar dor ia ka AMD ba ka dei ban phah tap noh ia baroh ki thliew kiba la tih ban wad Uranium da ka Maheswari Company ha Phodkud namar ia kine ki jaka ba ka tih kam shym don ka jingtap ia ki thliew.
Na ka liang jong u President jong ka KSU Ranikor Unit u la ong ba na ka liang jong ka Deputy Commissioner jong ka South West KHasi Hills District kala bthah ia ka Meghalaya Pollution Control Board ba ka dei ban leit jurip ia kane ka wah kaba la kylla rong bad mynta ki dang ap ia ka jingshem jong ka MSPCB.
La ong ba ha u snem 2010 ki dohkha ha kane ka wah kila iap haduh bay m lah ban tip shuh, hynrei ha ka jingjurip jong ka MPCB haba ka pynmih ia ka kaiphot kala kynnoh ba dei na ka daw jong ka jingtih dewiong, ia kaba ka seng kam lah ban pdiang, hynrei mynta haba kam don kata ka jingtih dewiong kumno kane ka wah ka kylla rong.
Ka seng kala ai nuksa ruh ka um kaba kylla rong dei tang na ka wahblei kaba ia jan bad ka Phodkud kaba don ka jingjurip ia u Uranium ha kane ka jaka, hynrei ka wah Riliang kaba tuid ha kane ka juh ka wah pat ka long kaba khuid khlem kylla rong ei ei.
La ong ba ka Maheswari kaba la jurip Uranium ha kane ka jaka kam shym la tap pat ia ki thliew kiba kala dep tih dei na kane ka daw ba ka seng ka dawa na ka sorkar ba ka dei ban hukum ia ka AMD ba ka dei ban phah tap noh mar dor ia ki thliew kiba la tih da ka Maheswari Company ha Phodkud.
Ha ka jingiap jong ki Dohkha ha u snem 2010 la kynnoh ia u Dewiong bad mynta ha kaba kam don ka jingtih dewiong pat balei kane ka wah ka jylla rong ha kaba ki briew kiba im ha katei ka thain kim nud shuh ban pyndon kam ia kane ka wah. Mynta leit kam don kata ka jingtih dewiong naduh ba la khang ka NGT kaei kaba ki leh mynta ka long ba ki die tang ia u ba la don.
Na ka liang jong ka KSU ia mynta kan ap ia ka jubab na ka MPCB aiu ka don ban ong halor jong kane lada kam ai ia ka jingpynshai kaba dei hok ka seng kam ban se ban leit sha ki bor kiba kham sha lor ban iada ia ka mariang.
