Shillong, Naitung 27: Ka KHadsawphra 
College, Mairang mynta ka sngi kala pynbup burom ia ki samla pule kiba la bha ha ki exksmin ka jong ki, kane ka long ban pynshlur ia ki samla pule kiba la wan ha khmat ha ka jingpule jong ki. Kine kiba la shah pynkup burom ki dei kiba la pass ia ka eksam HSSLC Commerce bad Arts Stream.
Ha kane ka jingialang pynkup-burom la ai sngewbha da ki momemtos bad certificate sha ki khynnah pule kumjuh ia ki samla pule BA bad B. Com. La pynkup-burom burom ia ki samla pule kiba ioh ‘distinction’ ha ki subject bapher bapher da ki momentos ha ka kyrteng u MLA ba rim ka Mairang u Bah Kitdor Syiem bam kwai ha dwar u Blei.
Kane ka College ha kane ka sngi ka la pynbna ruh ba ka la shah jied kum ka Centre ban thoh ia ki Under Graduate Examination naduh u 2018-19 ter ter da ka North Eastern Hill University (NEHU) ha ka 16 tarik u Naitung mynta u snem lyngba u Controller of Examinations u TK Singha.
Kane ka College ka don ha khrum ka Gallery jong ka madan ialehkai ka Khadsaw Phra Sports Association (KSA) bad ka rukom shna ia ka hi ka long kaba kham pher na kiwei pat ki skul pule. Lah ban ong ba kane ka College ka la biang bha ki jingdonkam baroh naduh ka Library, ki painkhana, ka um bam, bad kiwei kiwei kiba ki skul pule ki dei ban don.
U kongsan u ba la wan ban ia donlang ha kane ka sngi u dei u Bah HS Shylla, CEM ka Khasi Hills Autonomous District Council (KHADC), uba la pynpaw ka jingiaroh ha ka jngai jingkren jong u ha kaba ia dei bad kane ka College.
Haba ia dei bad ka dorkhas kaba la aid a ka College sha u CEM, na liang jong u CEM u la ong bay n sa peit ia kaei kaba la lah ban iarap ia kane ka College ha ka jingiatrei lang bad u MDC jong phi u Bah Equator Nongrang Dy Chairman KHADC,ha ka juh ka por u la ai khublei ia ki bor pyniaid kane ka College kiba la trei shitom ban pynsuk ïa ki nongshong shnong khamtam ki samla pule.
Ka jingdon kane ka College ka long ka jingkyrkhu ia ki samla ka thain khamtam kiba duna ha ka ioh ka kot bad pyllait na ki jinglut kiba bun ha kaba wan pule sha nongbah Shillong, ha ka juh ka por u la kyntu ia ki samla ban long kiba don ka jingkit-khlieh naka bynta ka lashai la shi sngi bad leh ia kiei kiei da ka jingsngewthuh na ka bynta ka ba bha na ka bynta ka jaidbynriew.
Kiwei pat kiba la ia donlang ha kane ka sngi ki kynthup ia u Bah Equator Nongrang, MDC ka Mairang Constituency kum u Symbud Kongsan, u Principal ka College u Bah Boldness L Nongum, ki dkhot ba dei bor pyniaid kane ka College, ki khynnah pule bad kiwei kiwei.
