Shillong, Nailar 16: U Myntri Rangbah ka jylla u Conrad K Sangma u la kyntiew ia ka Lama jong ka Ri India ha ka sngi rakhe ia ka sngi Laitluid kaba 72nd jong ka Ri ha Madan Polo, ha kane ka sngi u la ai khublei ia ki paidbah jong ka jylla ha kane ka sngi kaba khraw jong ka Ri.
Haka jingkren ka jong u myntri rangbah, u la ong haba phai sha mynnor ngi kynmaw da ka jingsngew burom ia ki riew khraw jong ka Ri India kiba la ialeh ban pynioh ia ka jinglaitluid na ka jingsynshar jong ki nongwei. Kine ki riew khraw ki long u Mahatma Gandhi, Pandit Jawaharlal Nehru, Maulana Azad, Netaji Subhas Chandra Bose, Sardar Vallabhai Patel bad shibun kiwei kiwei de kiba la don kti ban pynlait luid ia ka Ri.
Ha kane ka juh ka sngi, da ka jingsngew sarong ba na kane ka jylla Meghalaya ruh kila don ki riew khraw kiba la ia don bynta ha ka jingialeh ban pynlait ia ka Ri na ka kti jong ki nongwei bad kine ki riew khraw na kane ka jylla ki long u U Tirot Sing, U Kiang Nongbah, u Pa Togan Sangma, bad kiwei kiwei kiba la len ia lade na ka bynta ka sngi.
U myntri rangbah u la ong ba ka Ri mynta ka ioh ia ka jinglaitluid dei na ka jingaiti jong ki riew khraw bad ka jinglen lade ka jong ki. Ha ka juh ka por u la ong haba ka Ri ka rakhe ia kane ka sngi to ngin pynrung ha lade ia ka jinglen lade ban ai ka jingshakri na ka bynta ka jylla bad ka Ri baroh kawei.
U myntri rangbah u la ong ban kyntiew ia ka Ri kaba khraw don kam ia ka jingiatreilang jong baroh, ha ka juh ka por u la pynsngew ba ka jingiakhih kan ktah ia ka roi ka par jong ka jylla. Ban pynneh pynsah ia ka jingshong suk bad ban ia wan sha ka jingiasuk ka long kaba eh, hynrei dei ban ia pyrshang namar dei tang ka jingsuk kaba lah ban kyntiew ha baroh ki liang.
Na ka liang jongu myntri rangbah u la kyrpad ia baroh ki paidbah nongshong shnong jong ka jylla ba kin bat skhem ia ka burom jong ka jingshynshar paidbah bad haba ki don kino kino ki jingeh dei ban don ia ka jingiakren bad ka jingiamir jingmut ban poi sha ka thong jong ka jingjop. Ka sorkar ka sngewthuh kumno ban ialeh ha kaba ia dei bad ki jingeh kiba wan.
Ka sorkar kala kut jingmut ban pynneh pynsah ia ka jingshong suk bad ban kyntiew ia ka jylla ha baroh ki liang. Ka phang kaba ka sorkar ka shim khia ban kyntiew ia ka ioh ka kot dei ha ka rep ka riang ba thungsoh thungpai, kane ka kyntiew ia ka ioh ka kot jong ka jylla namar ka jylla Meghalaya ka dei ka jylla ba dang shaniah ha ka rep ka riang ha baroh ki nongkyndong bad kine ki long ki nongpyndap bam ia ki paidbah nongshong shnong ka jylla.
Nalor ka rep ka riang u myntri rangbah u la kren ruh ia ki kam jongohkai pyrthei kaba don ia ka lad kaba khraw ban kyntiew ia ka ioh ka kot bad ka lad ai kam ai jam sha ki samla ka jylla. Haba phai sha ka pule puhti u myntri rangbah u la ong ba ka sorkar kan ialeh ban pynbiang ia ki jaka ai jinghikai sha ki nongkyndong.
Ban wanrah ia ka shnong suk shongsain ka dei ka bynta kaba ha khmat eh ba ka sorkar ka don ban leh. Nalor kane don kam ruh ban pynneh pynsah ia ka mariang na ka bynta ka roi ka par jong ka jylla. U myntri rangbah u kyntu ia ki paidbah ban ialeh ban pynneh ia ka jingsuk bad dei ban khanglad ia kito ki kynhun kiba kwah ban wanrah ia ka jingklumar.
