Shillong, Rymphang 03: Mynta ka sngi u Deputy Superintendent ki pulit ba dei peit ia ka TAP u D K Prasad haba long kum u kongsan haba kren sha ki samla kiba ioh pdiang ia ki syrnot jong ki ba kila pyndep ia ka jingpule Komputer ha ka jaka ai jinghikai jong ka Ramakrishan Mission ha Quinton Road ha kaba u la kyntu ia ki samla ba kin kiar na u Drok.
Kane ka jingsam ia ki syrnot kaba la pynlong mynta ka sngi ka dei kaba 103 jong ka jingai jinghikai computer ha ka 3 tarik u Rymphang 2024 ha ka auditorium jong ka Ramakrishna Mission Vivekananda Cultural Centre Shillong.
Ka jingsam ia ki Syrnot ka don ha ki lai bynta,Toppers, Best Projects, Best Personalities kiba la ai ia ki shahhikai. Ka la don ka jingai sngewbha ia ka kor computer sha ka Gardenia Chyne bad Rosemary R Marak kiba la pyndep hynriew tylli ki jingai jinghikai na kane ka jaka.
Ha ka jingkren u Prasad u la iaroh ia ki jingai jingshakri ka Ramakrishna Mission ia ka imlang sahlang ha ki kam bapher bapher khamtam ha ka por jong ka khlam Covid.
U la ong ba u dap da ka jingkhuslai shaphang ki drok bad u la kyntu ia ki samla ba kin long kiba husiar shaphang ki jingma ha ka imlang sahlang. U la ong ruh ba ki dei ban ia sam ia ki jingnang jingstad bad ki jingshemphang ba ki ioh na kane ka jaka pule.
Ia ka statistical data jong ka resol la peit bniah da u Brahmachari Vairagyachaitanya, Director- Academics Ramakrishna Mission Vivekananda Cultural Centre uba la pyntip ba ki la don kumba 582 ngut ki shah hikai ha kane ka bynta ai jinghikai bad ba 414 na ki ki la ioh ia ki Syrnot.
Ki samla kiba la leh kham bha ha ki jingpule ki long Computer, haka jingpule kum ki Beginner la ioh da KaIbanroilin Lawai, Computer-Intermediate, ka Anjali Kumari, Computer, Accounting ka Khanchui Jajo, DTP (Part I): ka Karina Rai bad u Jiwanta Sinhana kiwei kiwei ki jingpule kiba kham halor.
Ha ka jingai jingkren jong u ha kane ka sngi, u Br Vairagyachaitanyau la pdiang burom ia baroh kiba la wan iashim bynta bad u la pynkynmaw ia ki shahhikai shaphang ka burom ba u Swami Vivekananda u la wanrah sha ka ri bad u la kyntu ia ki ba kin bud ia ki jinghikai jong u khnang ba kin don ka jingim kaba seisoh.
U la kren ruh shaphang ki drok bad u la kyntu ia ki shahhikai ba kin bud ia ka jingmut jingpyrkhat kaba shai bad kaba bha kaba wan na ka jingim jong u Vivekananda bad ba kin pynsaphriang ia kane hapdeng ki paralok jong ki.
Na ka liang jong baroh ki nonghikai, u Saurav Choudhury bad ka Napersara Nongkhlaw kila kitbok kitrwiang ia baroh ki shahhikai bad ki la ai jingmut ia ki ba kin bteng ia ka jingwad ia ka jingnang jingstad ha ki kam IT bad u Swami Divyaswarupananda Maharaj, ba dei peit ia kane ka jaka u la ai ia ka jingkren khublei.
