Shillong, Nailar 16: Ka Dorbar Shnong Khliehshnong, Sohra ha ka Sngi Thohdieng jong ka taïew ba dang shu dep ka la pynkup burom ia ki samla na kane kane ka Shnong kiba la wan sha khmat ha ka result ba dang shu pyllait shen jong ka eksam Secondary School Leaving Certificate (SSLC) bas Higher Secondary School Leaving Certificate (SSLC) jong ka Meghalaya Board of School Education (MBOSE).
U Bah Gavin M Mylliem, MLA ka Sohra Constituency u la wan ban ia donlang kum u Kongsan ha kane ka jingialang
pynkup burom ia ki samla pule ia kaba la pynlong ha Community Hall ka Dorbar Shnong Khliehshnong, Sohra. Kiwei pat kiba la ia donlang ha kane ka sngi ki kynthup ia u Rangbah Shnong ka Khliehshnong, Sohra, u Bah Shembhalang Kharwanlang, ki dkhot ka Education Committee ka Dorbar Shnong lem bad kiwei kiwei.
Ha kane ka sngi ka la don ka jingpynkup burom ba kham kyrpang ia u samla Gideon Lyngdoh, uba la bat ia ka kyrdan ba saw bad u samla Bansiewdor Dohling, uba bat ia ka kyrdan ba san (napdeng ki Top 10) jong ka eksam HSSLC (Arts)-2020. Kine baroh ar ngut ki dei ki samla pule na ka Ram Krishna Higher Secondary School, Sohra.Kum ban shu kdew u samla Gideon Lyngdoh u la ïoh 424 marks katba u samla Bansiewdor Dohling u la ïoh 421 marks.
U Bah Shembhalang Kharwanlang haba ia kren bad u nongthoh khubor u la iathuh ba kine ki samla kiba wan ha ka Top 10 ki dei ki samla kiba wan na ki longïing kiba duna ka ïoh ka kot. “Ngi na ka liang ka Dorbar Shnong ngi pynpaw ka jingsngew sarong na ka bynta jong ki bad ngi khmih lynti ba kin long ka nuksa ia kiwei ki khun samla ban minot bad pynleit jingmut ha ki jingpule khlem da klet ia ka akor ka burom”, la ong u Bah Shembhalang.
U Bah Gavin M Mylliem u la pynpaw ka jingai khublei kyrpang ia ka Dorbar Shnong kaba la pynlong ia kane ka prokram ban ai mynsiem ia ki samla pule. “Ban poi sha ka thong ym don lynti da kiwei kiwei pat lait na ka jingtrei minot bad pynleit jingmut la ka long ha ka pule puthi ne kiwei kiwei pat”, la ong u Bah Gavin uba la ai khublei kyrpang ia u samla Gideon bad u samla Bansiewdor lem ia ki samla kiba la wan ha ki kyrdan 1st Division na kitei ki ar tylli ki jingiakhun eksam.
U la kyntu ia ki samla ba kin nang iai trei minot ha ki jingpule khlem da klet ia ka akor ka burom. “Phi dei ban long borabor kiba don ka mynsiem ba ym dei ban pyndem khlem da ia aireng ia ki jingeh bad haba phi poi sha ka thong wat ai ba ka jingsarong kan jop hynrei long borabor kiba sngewrit bad pyni nuksa ia kiwei pat ki para samla da ka burom ka akor”, la ong une u nongmihkhmat.
