Shillong,Jylliew 18: Ka skul bah University of Science & Technology, Meghalaya (UTSM) mynta ka sngi kala pynlong ia ka jingpynkup burom ia kito ki samla kiba la pass bha ha ka eksamin SSLC bad HSLC, ha ka jingiadon lang u myntri rangbah ka jylla u Conrad K Sangma bad u Bah Lahkmen Rymbui myntri ka tnad pule puthi bad u Dr DD Lapang ha Ri Bhoi District.
Ha ka jingkren jong u myntri rangbah kum u kongsan ha kane ka sngi, u la kyntu ia ki samla pule ba la wan sha khmat ba kin long kiba sngewrit, ha ka juh ka por u la ai ka jingiaroh ia ka jinglah jong ki bad kane ka dei na ka jingminot bad ka jingtrei shitomm ha ka juh ka por u la ong ba ka long kaei kaei kaba ym sngewtynad ban iohi ba bun ruh kiba phail.
La ong ba kane ka jingphail jong ki khynnah la iohi ha kine ki bun snem mynta bad kane ka long ka jingeh ia ka sorkar jylla. La ong ba ki samla ki dei ki lawei jong ka ri bad ka jylla, ka Ri ka Jylla ka don kam ia ki samla kiba kiba la don ka jingtbit ba biang ha kaba shimti ia ki kam ki kam na ka bynta ka jingkiew jong ka Ri bad ka jylla ruh kum juh.
Ha kane ka sngi u myntri rangbah u la ong ba kum kane ka jaka pule kaba la kham wan sha khmat ka don ia ka bynta kaba khraw ha kaba pynlong ruh ia ki jingwad bniah namar kane kan ia rap ha kaba wanrah ia ka roi ka par ha ka jylla.
Haka jingkren jong u myntri ba dei peit ia ka pule puthi u la ong ba ka jingshim khia lang jong ki kmie ki kpa bad ki nonghikai ka wan rah ia ka jingtop ha ki samla pule. U la kyntu ia ki samla pule ba kin dang iai beteng ia kane ka jingtrei shitom ka jong ki ba kin dang kiew sha khmat.
Ha kane ka sngi u myntri rangbah u la sam da ki Laptop ia ki samla pule kiba wan sha khmat, baroh kiba la wan sha khmat ha ka eksamin SSLC baf HSLC mynta u snem 2019 na kane ka jaka pule ki long 74 ngut.
