Shillong, Iaiong 06: U President jong ka seng ki nongrep ka Hill Farmers Union (HFU) u bah Commander Shangpliang u la kyntu ia ka sorkar jylla ba kan shah ban plie man ka sngi ia ki dukan die jhur khnang ba kan long ka jingiarap ia ki nongrep namar ki don bun ki jhur kiba la mih bad dei ka por ban kheit noh.
Haba iakren bad u nongthohkhubor u la iathuh ba, ka jingailad tang shisngi bad khang ar sngi ha kine ki por curfew ka la wanrah jingeh ia ki nongrep namar kim lah shuh ban pyniaid iew ia ki jhur man ka sngi. Nalor kane ki nongrep kim don pisa shuh ban thied khaw bad kiwei ki mar bam namar ba kim lah shuh ban die ia ki jhur man la ka sngi.
Kumta u la kyrpad ia ka sorkar ba kan shah ban plie ia ki dukan die jhur kumba shah ia ki dukan khaw bad ki dukan die dawai khnang ba yn lah ban pyniaid iew man la sngi ryngkat ka jingbud beit ryntieh ia ki kyndon kumba la buh da ka tnad ka koit ka khiah.
Ha kawei pat ka liang u bah Shangpliang u la ong ba kum ka dak ban ai mynsiem ia ki nongrep na ka jylla bad khnang ban lah ban pyniaid iew ia ki mar kiba mih na la ka ri, dei ban shah tang ia ki mar jhur ban wanrah na kiwei ki jylla kum na Assam tang ia ki mar jhur ki bym mih na ka jylla namar ki jhur khasi kim lah shuh ban die ia ki mar naka jylla lada wan bun u jhur na shabar ka jylla bad kane ka buh jingeh ia ki nongrep ka jylla, u la bynrap.
Ha kawei pat ka liang une u nongialam jong ki nongrep u la kyntu ia ka sorkar bad baroh ki nongmihkhmat (MLA) bad MDC ba kin iarap ban pynpoi khaw ha ki shnong ha ka jylla namar bun ki nongrep ha ki shnong bapher bapehr ki don hapdeng ka jjingduna khaw bad duna pisa ruh kumjuh. U la kyntu ruh ba ia u khaw rashon dei ban sam ruh sha kito ki paidbah ki bym don ka rashon card.
