Jowai, Jylliew 10: Ka Jaintia Youth Federation (JYF) Central Body ha u kyrwoh khubor ba la pyllait mynta ka sngi da ka Seng ka la pynpaw ia ka jingsngewkhia halor ka jingbuhteng jong ka sorkar ban pynurlong noh ia ki kular jong ka na ka bynta ban ai ka jingiada ia ki mynsiem ba kordor kiba don hapdeng ka jingpang jingshitom, kiba donkam ban ioh ia ka snam ha ka por ba kyrkieh lyngba ka blood bank hangne ha jowai, phewse ka long tang ka rngai bad ka jingpynbiej ia ki ba bun balang da kane ka sorkar khwan burom ba shu pynheh ia ka tyngam ba lyngkot khlem lah pyndep.
U Minister ba dei peit ia ka tnad ka koit ka khiah u dei ban shim ka jingkit khlieh ban pynjia long ia ki kular jong ka sorkar ban buh noh ia ka blood bank kaba biang ban ai ka jingshakri ia ki paitbah jong ka jaintia hills kumba la daw da ka JSU na ka bynta ka jingmyntoi jong pateng ka ban sawan kiba don hapdeng ka pang ka shitom,
Hynrei ba dei halor kane ka nongrim ba ka sorkar kam shym la bat ia ki ktien kaba la dep khlei ha khmat jong ki paidbah, haduh mynta kam shym la lah satia ban sdang ia katei ka jaka kynshew snam kaba dei na ka bynta ka iap ka im haba pang bad shitom, ka JYF da kawei ka jingmut ka seng ka ai jingkyrshan ia ka JSU halor ka jingkhot pakhang shnong ba 12 kynta ka ban sdang naduh ka por 5 baje mynstep bad kut haduh ka 5 baje janmiet jong ka 12th-June-2014.
Ka jingdawa jong ka JSU ban ioh ia ka jaka kynshew snam ha Jaintia Hills kam dei na ka bynta ka jingmyntoi jong ki khynnah skul ha jaintia, hynrei ka dei ka jingdawa ba shong nia na ka bynta ka iap ka im jong ki para doh para snam jong ka Ri lum jaintia hi baroh kawei ong u samla Heibor Pariat Organising Secretary ka JYF Jowai City.
Kumta na ka liang ka JYF ka kyntu ia ki paitbah jong ka Ri lum jaintia ba kin sngewbha ban ia snoh kti lang bad ka JSU halor kane ka jingkhot pakhang shnong ba 12 kynta jong ka khnang ba ka sorkar kan shim khia ban pynioh noh ia ka jaka kynshew snam ba pura ha Jaintia Hills pynkut
u kyrwoh na ka JYF.(SP News)
