Shillong, Risaw 28: Ha ka jingsngewkhia halor ka khubor sospon ia ki katto katne ngut ki Dolloi ha Jaintia Hills, u Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, bad Spokesperson, Federation of Khasi States, u la ong ba u la iai kren la bun bun snem mynta ia ki bor Khasi, Jaintia bad Garo Hills District Council bad kine ki jingiakynad baroh ki long namar haduh kine ki sngi ki District Council Khasi bad Jaintia hills kim shym la pyndep ia la ka kamram ban pynlong AIN ia ki Riti Dustur ha baroh ki 54 Hima/Elaka ha Khasi Hills, 18 Elaka Dolloi kawei ka Sirdarship ha Jaintia Hills bad 1400 spah ngut ki Nokma ha Ri lum Garo Hills.
Kumba ka long mynta ha Jaintia Hills baroh ki 18 Elaka Dolloi kim don kawei ruh ka Act ne ka Rule, katba ha Khasi Hills ki na ki 54 Hima /Elaka tang kumba 12 tylli ki Hima/Elaka ki don ki Act ki Rule kiba shai kiba treikam. Katba ki District Council ki la don mynta 64 snem (1952-2016).
U la pynpaw ba u la leit ia kynduh bun sien ia ki CEM ha Khasi, Jaintia bad Garo Hills ban pynsngew ia kane ka phang hynrei sngewsih kim don por namar kumba ka long ia ki District Council la ia shim bynta da ki Seng Sain Hima (Party) kiba synshar ia ki jingsynshar tynrai kiba shong nongrim ha ka jingbym don liang lane ym don opposition lane Ruling ha ki Shnong, Raid bad Hima /Elaka. Ka jingsuki palat ki District Council ban pynlong AIN ia ki jingsynshar tynrai ka long ka daw bah kaba wanrah ia ki jingeh ha kane ka Ri, kumjuh ka jingbym don ka jingia sngewthuh jingmut hapdeng ki District Council bad ka Sorkar Jylla ruh ka long ka daw kaba ktah ia ka jingpynlong AIN ia ki Riti Dustur, katno kan jinglada bha lada ki District Council kin long noh kiba khlem Party, namar kumba long mynta ki riewshimet ki long ka kynhun kaba heh tam !.
Ha kaba iadei bad kane ka jingshah sospon ia ki Dolloi, u bah John F Kharshiing, ha ka 26 tarik October 2016, u ioh lad ban la kren da ka phone ia u Bah Thombor Shiwat, MDC, CEM, JHADC ban kyntu ia u bad ka Executive Committee, JHADC, ban thaw lad thaw lynti ban shim khia ban pynbeit ia kane ka kam da ka jingiasngewthuh jingmut khnang ban kan nym don ka jingktah ia ka synshar khadar, khamtam ka niam ka rukom ha ki Elaka Dolloi. Na ka liang u CEM, JHADC u la ong ba ka EC jong u ka long kaba kloi ban ia pynbeit ia kitei ki jingeh.
U Bah John F Kharshiing, Chairman, ka Dorbar u la pynpaw ba dang shen ki Khlieh Nongsynshar ki la ioh ai dorkhast ha u Prime Minister, halor ka Instrument of Accession bad Annexed Agreement bad la ioh ka jubap ba u la phah sha ka National Commission for Scheduled Tribes, kaba la phah kylla bran bran ia katei ka dorkhast sha u Secretary, Ministry of Home Affairs,(MHA) Govt of India, bad dei na kane ba ka Dorbar Ki Khlieh Nongsynshar Ka Ri Hynniewtrep, ka Federation of Khasi States, haduh kine ki sngi ki dang iai buddien ia ka IOA & AA, ban ioh ia ka Assembly kaban ithuh da ka Constitution Ri India na ka bynta ki Nongsynshar naduh Shnong, Raid haduh Hima kaban long khlem liang.
Ha ka jingshisha ki MDC ki la dei ban mih katkum u pud u sam jong ki 54 Hima Elaka ha khasi, bad 19 Elaka ha Jaintia Hills bad ki kyrtong ki la dei ban mih na ki Hima ym na ki Party.
